Dr. Horacio Oduber Hospital ta preparando, hunto cu sindicato ABV pa un CAO nobo y hasta a pidi pa mediador di gobierno tey presente den esaki. Sindicato tin algun deseo.
Director financiero Theo de Kool a splica cu hospital tin algun aña trankilo riba tereno di CAO. Tabata tin un CAO for di 2015 te cu 2018. Esey a traha riba su mes hopi bon. Tin di compronde cu e sindicato kier pa cambia algun cos den esaki. De Kool ta asumi cu trahadonan lo kier adapta e salarionan despues di algun aña cu no tabata tin ahuste.
Esey tambe ta un di e puntonan di mas importante den e CAO, cual ta hopi cla.
Mescos cu e otro negociacionnan, a envolvi mediador di gobierno. Ta ripara cu e ta traha hopi bon y cu ta crea un paz den e negociacionnan. Un tercer partido por duna un bon sugerencia pa solucion di problemanan. Esey a yuda tambe pa tin un bon CAO.
Como Hospital, kier algun cos. Tambe nan kier un bon CAO pa algun aña pasobra e ta duna trankilidad, claridad y siguridad riba e desaroyo di e costonan pa hospital y tambe pa AZV y e pais mes.
Fuera di esey tambe hospital kier pa tin mas tanto posibel stem af e CAO cu e otro instancianan den cuido. Tin den e ultimo añanan, un cantidad di persona, door di minister, door di AZV mes, door di e sindicatonan y tambe door di Hospital mes, a papia riba e deseo pa tin un CAO riba un base amplio pa e isla. Tabata tin algun combersacion cu algun institucion den cuido riba esaki. Nan kier tuma e prome pasonan pa un propio CAO. Esey ta nifica cu tin cu bay en busca di diverso condicionnan di trabao, pa asina bin hunto awor aki ta purba di inventarisa unda tin e diferencianan di mas grandi. Esey ta keda riba e premienan di voorjaar y najaar. Na Hospital no tin esaki y otro institucionnan cu tin condicionnan di trabao cu ta parce esun di gobierno, tin esaki si ainda.
De Kool ta sinti cu e lo bay logra pa haya fondo pa asina ehecuta e modificacionnan aki. De Kool ta tuma nota di e situacion financiero di e pais y tambe e espacio cu AZV tin pa cubri e costonan aki. Cada subida di costo mester wordo cubri pa AZV. Ta e mesun storia cu a conta 3 aña pasa, cual storia e ta conta cada biaha. Tur cos cu tin na subida di costo, mester bin di AZV. Esey ta nifica tambe cu e subida di costo cu AZV no por cubri, e ora Hospital no por priminti na e trahadornan. Esey aparentemente lo ta un di e knelpunten den e negociacionnan. E espacio pa un modificacion no lo ta mucho grandi y esey tin di haber cu e situacion financiero di e pais. Pero tambe door di AZV mes, cu no tin un espacio pa subida di costo.
Situacion dificil
Segun de Kool, na 2014 gobierno a yuda. Minister Visser tabata tey durante esaki. Finalmente AZV mester a paga esaki. Esaki no a trata di un suma grandi y tabata trata di 1 aña. E biaha aki e ta otro. Ta un CAO di algun aña y tin aumento di costo. Tambe AZV mester por garantisa esaki cu nan por cubri e subida di costo. Esey ta nifica cu nan no por aproba tanten cu nan no bay di acuerdo cu AZV, cual ta hopi importante. Ta hopi importante tambe pa e otro dunadonan di trabao den cuido pa ta riba e mesun liña. Nan tur ta depende di finansas di parti di gobierno, na no por haci ningun promesa ni na sindicato y trahadonan, si nan no tin placa. Awor aki nan ta basta tempran den e negociacionnan. Tur ora ta logra den paso di añanan pa haci bon acuerdonan. Sindicatonan tabata bon envolvi como tambe mediador di gobierno y de Kool ta pensa cu e biaha aki tambe lo logra.
