Pa 65 aña caba Young Men’s Christian Association (YMCA) ta formando parti di e comunidad di Aruba, ofreciendo personanan di tur edad un espacio unda nan por ta nan mes, sin importa e rasa, genero, religion of cultura di un persona. Pa hopi aña YMCA ta conoci pa ofrece diferente tipo di curso, organisa vakantiekamp pa nos muchanan y hubentud y tambe YMCA ta ofrece un programa di traimerdia (Y’s Care) pa muchanan entre 4 pa 17 aña.
Lamentablemente, COVID-19 tabata tin un impacto grandi riba nos organisacion, nos actividadnan y nos finansas. Nos labornan usual mester a stop, mientras cu nos gastonan a keda halto. For di un comienso nos a implementa diferente medida pa nos organizacion por keda funciona, pero financieramente e ta keda un reto inmenso.
A pesar di e circunstancianan aki unda cu YMCA tin e hopi dificil, nos a continua cu nos proposito pa ta un centro di sosten pa nos comunidad. YMCA hunto cu CEDE Aruba y Rode Kruis Aruba a uni man y ta formando parti di e proyecto ‘Meals on Wheels’, cu a cuminsa for di 20 di april 2020 y cu ainda ta activo. Nos cushina na YMCA San Nicolas ta operando 7 dia pa siman, cu ayudo di
nos personal y boluntarionan for di CEDE, preparando 200 cuminda pa dia cu despues Rode Kruis ta distribui rond di nos isla na e personanan menos afortuna. Nos ta sumamente orguyoso y ta sinti nos honra di ainda por forma parti di e proyecto y di e manera aki yuda nos comunidad.
Awo YMCA kier pidi ayudo di e publico en general. Durante hopi aña nos a conta cu sosten di pueblo y awo mas cu nunca nos mester di dje. Mas cu claro nos ta compronde cu e situacion no ta facil pa ningun hende, pero cualkier ayudo ta sumamente balora.
Si bo persona ta desea di haci un donacion na YMCA, por haci esaki na 3 manera: por pasa libremente na nos localidad na Dakota of San Nicolas, por haci un transferencia di banco na e cuenta di YMCA of Aruba, CMB # 992.112.05 of por busca YMCA den e app di pay.aw.
Comunidad di Aruba, nos sa cu nos por conta cu boso sosten. Ariba 27 di april YMCA lo ta cumpliendo su di 65 aña di existencia y nos lo aprecia sinceramente cualkier ayudo cu nos por haya di nos pueblo. Sostene YMCA pa asina YMCA por sigui sostene nos comunidad.
