Sally Vos di 24 aña di edad a gradua recientemente como abogado na Miami, Florida. E ta biba eynan cu su mama y ruman homber grandi desde cu su tata a fayece na Aruba na aña 2001. El a studia na Florida International University (FIU) den ciencia politico, relacionnan internacional y a specialisa den leynan di inmigracion. El a opta pa sigui den abogacia y a tuma un trabou como consehero legal den un “franchise” grandi na Miami, esta The Spot Classic Barbershop.
Sally Vos a conta nos awe cu e ta masha contento di por a sigui pasonan di su tata. Ta cu Watty Vos den mente mes el a opta pa sigui studia ley. E compania cu e ta traha pe ta estableci desde 2001 y tin 18 locacion rond di estado di Florida. E ta atende cu tur aspecto legal di otorga frankicia, di lease, di recursonan humano y asina por sigui menciona un lista di otro responsabilidadnan cu e ta ocupa awo.
Mester menciona cu e ruman homber grandi sinembargo, cu awendia tin 26 aña di edad, Edgar Salomon Vos, a opta pa studia finansa. El a termina su “College” den ramo di finansa y tin su mesun compania. Ambos a bisa di ta sinti hopi falta di Aruba y ta pensa hopi riba nos isla constantemente.
Dia 6 di januari 2021, Watty Vos lo cumpli 20 aña cu el a fayece. Awendia su nomber ta mas bibo cu nunca, cu un boulevard completo riba su nomber, esta Ringweg # 3 y e scol pa polis cu for di hopi aña atras caba ta dedica na dje. Watty Vos a funda MEP hunto cu Betico Croes, a lanta su mesun partido RUBA y despues a integra den partido AVP, unda el a sigui te na su morto na aña 2001. El a ocupa e puesto di Minister di Husticia den Antias y despues tambe den e prome gobierno di pais Aruba y den e gobernacion 1997 pa 2001.
