Diadomingo atardi Polisnan a bay pura na Sabana Basora. A drenta informacion cu un mucha kier pa Polis yega pura. E mes a yama y splica cu e padrastro ta maltratando su mama. Na yegada Polis a atende cu e problema.
A constata cu e homber tabata bou influencia y no kier a rasona, pa cual a opta pa detene mesora. A transporta e sospechoso pa Warda di Polis pa ey present’e na un Sub Fiscal cu mester dicidi riba su encarcelacion of no.
Mientras cu di un banda ta atende cu e sospechoso y alabes abusado di hende muhe, a pidi tambe presencia di e ekipo profesional di slachtofferhulp pa atende cu e problema na cas. E mucha a keda afecta pa motibo di agresion contra su mama.
E yiu a bisa e Polisnan cu ta constantemente e mama ta victima di violencia domestico y e no por acepta esaki mas. Ya cu su mama semper na final ta pordona, el a dicidi e biaha aki ta basta. Si su mama no ta haci nada, cu e si ta actua y ta keha e homber na Polis!
Cu e maneho nobo cu e Procurador General saliente a anuncia, ta detene tur sospechoso di violencia domestico, sea cu e victima denuncia of no. Tambe e mesun maneho ta papia di bay cera algun dia pendiente e investigacion, pues nada di pasa 8 ora cera pa bolbe cas pa sigui golpia e señora y eventualmente e yiu den cas.
Den comunidad e maneho aki ta carga sosten pasobra diariamente ta lesa di casonan di violencia domestico y ultimamente hasta cu ta resulta fatal pa e victima. E solucion? Demanda e abusadonan y cera nan!
