E yegada tradicional di Sinterklaas den e bario Carnisse na Rotterdam ta sigui e aña aki, a pesar cu e wijkraad a dicidi di no contribui financieramente. E decision a provoca reaccion fuerte entre habitantenan y organisadonan, pero entre tanto a haya un solucion pa cubri e suma cu tabata falta.
E controversia ta relaciona cu un tradicion organisa den e area di Rotterdam-Charlois pa mas di 30 aña. Cuater di e shete miembronan di e wijkraad a vota contra un contribucion di 1.250 euro, mientras tres a vota na fabor. E placa ta destina pa e yegada y bishitanan di Sinterklaas na e barionan.
Segun presidente di e wijkraad, Inge Pechler, inclusion ta un punto central den e decision. El a indica cu no tur hende ta sinti nan mes comodo cu e imagen di un homber blanco cu ayudantenan cu cara preto. Den su opinion, e cambio pa Pietnan cu marca di shinishi riba nan cara, conoci como roetveegpieten, ainda no ta suficiente.
Organisado Arjan van Es a reacciona sorprendi. El a splica cu Rotterdam tin añanan cu un acuerdo cu subsidio ta wordo otorga solamente na eventonan cu roetveegpieten y cu su organisacion a sigui e acuerdo aki sin problema. Su preocupacion principal ta e efecto riba e muchanan.
Entretanto, otro wijkraad den Charlois y un accion di recaudacion a ofrece un salida pa e problema financiero. Kevin van Eikeren a confirma na OPEN Rotterdam cu e yegada ta sigui e aña aki. E decision pa rechasa subsidio, pues, no a resulta den cancelacion definitivo di e evento.
Mientras e discusion local ta sigui, Hulanda ta preparando pa e yegada nacional di Sinterklaas, programa pa diasabra 14 di november 2026 na Grave, den municipio Land van Cuijk. Ta spera Sinterklaas y su Pietnan rond di 12or di merdia na Maaskade, sigui pa un desfile door di e centro historico te na Markt. E programa ta dura te 4’or di atardi y transmiti en bibo via NPO Zapp.
Preparacionnan ta inclui permiso pa e evento, organisacion di trafico, ceramento di cayanan y informacion pa habitantenan y comercio. E municipio a confirma cu e permisnan necesario pa e yegada a wordo otorga.
Pa muchanan di henter Hulanda, e anticipacion ta cuminsa oficialmente dialuna 9 di november, ora Het Sinterklaasjournaalta bolbe na television tur dia pa 6or di atardi. E programa ta sigui e aventuranan rond di e yegada di Sinterklaas, den preparacion pa e celebracion di dia 5 di december.
