Federacion di Trahadornan di Aruba (FTA) ta mantene firmemente cu cada trahado tin derecho riba un salario husto y digno, cu ta permitie cubri su necesidadnan basico y participa di forma digno den sociedad. P’esey FTA ta sostene e meta pa eleva salario minimo legal te na e nivel di minimo di subsistencia (bestaansminimum), di manera cu cada trahado por gana un salario cu ta permitie mantene un bida digno (living wage).
Pa demasiado tempo caba tin un diferencia considerabel entre salario minimo legal y e entrada cu un persona mester pa por cubri su gastonan basico di bida na Aruba. No por considera e situacion aki socialmente aceptabel ni sostenibel.
Un trahado cu ta cumpli cu un siman completo di trabao mester por mantene un nivel di bida decente, sin mester depende constantemente di un di dos trabao of di asistencia di gobierno simplemente pa por cubri su necesidadnan esencial.
E pregunta, p’esey, no ta si trahadonan merece un salario digno. Nan merece esaki sin mas. E pregunta fundamental ta con Aruba por garantisa cu un aumento di salario realmente ta resulta den un mehoracion duradero di nivel di bida di trahadornan.
𝗠𝗶𝗻𝗶𝗺𝗼 𝗱𝗶 𝘀𝘂𝗯𝘀𝗶𝘀𝘁𝗲𝗻𝗰𝗶𝗮 𝘁𝗮 𝘂𝗻 𝗺𝗲𝘁𝗮 𝗰𝘂 𝘁𝗮 𝗰𝗮𝗺𝗯𝗶𝗮 𝗰𝗼𝗻𝘁𝗶𝗻𝘂𝗮𝗺𝗲𝗻𝘁𝗲
Un di e desafionan fundamental relaciona cu e aumento di salario minimo te na e nivel di minimo di subsistencia (bestaansminimum) ta cu e ultimo aki no ta un suma di placa fiho. Ta adapta e minimo di subsistencia periodicamente conforme cambionan den costo di productonan y servicionan esencial. Consecuentemente, aumento di prijs di productonan y servicionan por causa cu e cantidad di placa cu un persona mester pa mantene un nivel di bida socialmente aceptabel tambe ta aumenta.
Desaroyonan reciente na Aruba ta ilustra concretamente e realidad aki. Segun cifranan publica pa Oficina Central di Estadistica (CBS), e minimo di subsistencia mensual pa un persona so a aumenta di Afl. 2.683 na juli 2026, pa Afl. 2.697 na augustus y posteriormente pa Afl. 2.700 na september 2026. Durante e periodo aki, salario minimo legal a keda aproximadamente Afl. 2.007 pa luna, locual ta representa un diferencia di Afl. 693 na september 2026.
Maske e aumento di minimo di subsistencia (bestaansminimum) durante e dos lunanan aki tabata relativamente limita, e ta ilustra un realidad socioeconomico importante: e cantidad di placa cu un trahado mester pa cubri su gastonan basico ta cambia conforme e prijsnan di producto y servicionan ta cambia.
E aumento antes menciona no tabata consecuencia di un aumento corespondiente di salario minimo. Sinembargo, e ta demostra dicon ta importante pa tene debidamente cuenta cu e desaroyo di prijsnan di consumo ora di diseña un maneho cu tin como meta pone salario minimo na e mesun nivel cu minimo di subsistencia.
𝗘 𝗿𝗶𝗲𝘀𝗴𝗼 𝗱𝗶 𝗰𝗼𝗺𝗽𝗿𝗼𝗺𝗲𝘁𝗲 𝗲 𝗺𝗲𝘁𝗮 𝗰𝘂 𝗻𝗼𝘀 𝗸𝗶𝗲𝗿 𝗹𝗼𝗴𝗿𝗮
“Maske FTA ta sostene firmemente e meta di un salario digno, nos ta enfatisa cu no por considera un aumento di salario minimo legal como un medida economico aisla. Un aumento substancial di salario ta afecta e structura di costo di empresanan cu tin trahadonan cu ta gana salario minimo of un salario cercano na dje”, segun Hose Figaroa, Presidente y Secretario General di FTA.
Dependiendo di nan situacion financiero y e condicionnan di competencia den cual nan ta opera, algun empresa por purba recupera e gastonan adicional aki door di aumenta prijs di nan producto y servicionan. Si esaki sosode riba un escala suficientemente amplio, e por contribui na presion inflatorio adicional.
Esaki ta crea e riesgo di un circulo vicioso: salario ta aumenta pa yega na e minimo di subsistencia, pero e eventual aumento di prijsnan di consumo ta causa cu e minimo di subsistencia mes ta bolbe aumenta, locual por reduci parti di e mehoracion den poder di compra cu e aumento di salario tabatin como meta. Den un situacion asina, e meta pa pone salario minimo na e mesun nivel cu minimo di subsistencia por bira cada biaha mas dificil pa logra y, particularmente, pa mantene.
FTA ta enfatisa cu esaki ta un riesgo potencial y no un consecuencia inevitabel di aumento di salario. E magnitud di e riesgo ta depende di diferente factor, manera e tamaño y forma di implementacion di e aumento, e capacidad di empresanan pa absorba gastonan adicional, desaroyo di productividad y e situacion economico general. Sinembargo, no por ignora e posibilidad aki.
Pa FTA, e berdadero medida di exito no por ta simplemente si salario minimo legal a yega na un suma determina di placa. Mester midi e exito a base di si, despues di e aumento, trahadonan realmente por permiti nan mes un miho nivel di bida.
𝗣𝗿𝗼𝘁𝗲𝗰𝗰𝗶𝗼𝗻 𝗱𝗶 𝗽𝗼𝗱𝗲𝗿 𝗱𝗶 𝗰𝗼𝗺𝗽𝗿𝗮 𝗱𝗶 𝘁𝘂𝗿 𝘁𝗿𝗮𝗵𝗮𝗱𝗼
FTA kier hala atencion tambe pa e consecuencianan cu un aumento di salario minimo por tin pa empleadonan cu ta gana un salario mas halto cu e minimo legal. E trahadonan aki no necesariamente lo ricibi un aumento corespondiente di nan salario, mientras cu nan lo por wordo afecta pa aumentonan den prijs di producto y servicio. Un maneho cu tin como meta mehora e posicion di e trahadonan cu ta gana menos, mester tene cuenta tambe cu e efectonan cu e por tin riba otro categorianan di trahado.
Ademas, mester duna atencion na e posibel efectonan riba empleo, particularmente den empresanan cu tin un capacidad financiero limita pa absorba aumentonan substancial di costo laboral. FTA ta enfatisa, sinembargo, cu e consideracionnan aki nunca por sirbi como hustificacion pa mantene un situacion den cual trahadonan ta ricibi un salario cu no ta suficiente pa cubri nan necesidadnan basico! Al contrario, nan ta demostra e necesidad di un acercamento integral, den cual ta comparti e responsabilidadnan relaciona cu mehoracion di nivel di bida di un manera husto.
𝗥𝗲𝘀𝗽𝗼𝗻𝘀𝗮𝗯𝗶𝗹𝗶𝗱𝗮𝗱 𝗱𝗶 𝗚𝗼𝗯𝗶𝗲𝗿𝗻𝗼 𝘆 𝗺𝗲𝗱𝗶𝗱𝗮𝗻𝗮𝗻 𝗰𝗼𝗺𝗽𝗹𝗲𝗺𝗲𝗻𝘁𝗮𝗿𝗶𝗼
FTA kier subraya cu no por pone e responsabilidad pa logra un salario digno exclusivamente riba dunadonan di trabao mediante un aumento di e salario minimo legal. Gobierno di Aruba tin un responsabilidad esencial pa crea e condicionnan socioeconomico necesario pa garantisa cu e aumento di salario ta resulta den un mehoracion berdadero y sostenibel di poder di compra.
Consecuentemente, FTA ta considera necesario cu e aumento progresivo di salario minimo mester bay acompaña pa medidanan fiscal, economico y social adecua. E medidanan aki por inclui incentivo fiscal dirigi na empresanan cu realmente ta enfrenta dificultad pa absorba gastonan laboral adicional, iniciativanan pa controla e costo di producto y servicionan esencial y medidanan pa fortalece productividad y resistencia di nos economia. E medidanan aki mester ta transparente, proporcional y muy en especial acompaña cu mecanismonan di control(!). Esaki pa garantisa cu recursonan publico realmente ta contribui na e metanan social cu nan tin como proposito.
Na mes momento, un plan di implementacion creibel mester inclui evaluacion periodico di e efecto real riba prijsnan di consumo, poder di compra di famianan, empleo y actividad economico. E evaluacionnan aki mester permiti pa adapta e medidanan complementario na tempo, en bes di bira un obstaculo permanente pa logra un salario digno. Mester pone atencion particular na e desaroyo di minimo di subsistencia mes.
Si e meta ta pa garantisa cu salario minimo ta permiti un nivel di bida socialmente aceptabel, anto e factornan cu ta causa cu costo di necesidadnan basico ta aumenta mester forma parti integral di e maneho. No ta suficiente pa aumenta e entrada di un trahado si, na mes momento, no ta haci nada pa mitiga e aumento di su gastonan esencial.
𝗘 𝗺𝗲𝘁𝗮 𝗳𝘂𝗻𝗱𝗮𝗺𝗲𝗻𝘁𝗮𝗹 𝗺𝗲𝘀𝘁𝗲𝗿 𝗸𝗲𝗱𝗮 𝗶𝗻𝘁𝗮𝗰𝘁𝗼
FTA kier enfatisa cu nunca mester confundi e posibel consecuencianan economico di un aumento di salario minimo cu oposicion contra mehoracion di entrada di trahadonan. E derecho riba un salario husto y digno ta keda e punto di salida fundamental. Sinembargo, FTA ta considera cu su responsabilidad como organisacion sindical ta bay mas leu cu simplemente exigi un salario minimo nominal mas halto.
“Nos responsabilidad ta tambe pa contribui na garantisa cu e mehoracion cu ta ambiciona realmente ta resulta den un mehoracion duradero di e posicion economico y social di e clase trahado. Nunca por considera un aumento di salario, absorbi den gran parti door di un aumento di costo di bida, como un medida cu a logra su proposito. P’esey FTA ta sostene un trayecto progresivo pa yega na un salario minimo cu ta coresponde cu e minimo di subsistencia (bestaansminimum), acompaña pa medidanan concreto y efectivo pa proteha poder di compra di tur trahado y garantisa sostenibilidad di economia di Aruba, segun Hose Figaroa, Presidente y Secretario General di FTA.
“Nos meta no por ta simplemente pa aumenta salario minimo riba papel. Nos meta mester ta pa garantisa cu trahadonan realmente tin e posibilidad financiero pa mantene un nivel di bida digno. Esaki ta e diferencia real entre un salario mas halto y un berdadero salario digno”.
