Rey Charles III a demostra cu ainda e sa disfruta di un fiesta ora cu el a participa den un desfile tradicional na Nassau, capital di Bahamas, dia 28 di october. Durante e di dos dia di su gira pa Caribe, e monarca Britanico a bisti un bril di solo, a sacudi campananan y a baila mientras e tabata tin wanta banderanan di Bahamas. E escena aki a hala atencion rapidamente riba e rednan social.
E rey a participa den e desfile tradicional di Junkanoo na Parliament Square, rondona pa bailadonan cu trahenan colorido y yen di detaye, cu tabata move na ritmo di musica. Den e imagennan, tabata mustra con Charles III tabata move su curpa y sigui e ritmo, mientras e participantenan tabata draai rond di dje.
E escena a provoca hopi reaccion riba internet. Un usuario a comenta cu e ekipo di siguridad di e monarca tabata parce tin dificultad pa sigui su ritmo, mientras un otro a califica e como “e rey mas cool di tur.”
Rebecca English, editor specialisa den asuntonan di famia Real p’e corant Daily Mail tambe a reacciona riba e imagennan. El a señala cu e entusiasmo di e monarca tabata asina grandi cu casi el a perde den e plumanan y e trahenan yamativo di e participantenan.
Su gira tambe ta marca pa debate riba sclavitud
Aunke Charles III a mustra su mes contento durante su bishita na Bahamas, su gira di nuebe dia pa Caribe tambe a genera controversia. Prome cu su yegada, activistanan, organisacionnan, experto y politico a pidi e monarca pa reconoce e papel di Gran Britania y di famia Real den comercio transatlantico di hende sclavisa, y pa duna contesta na e reclamonan pa compensacion.
E rey a yega Bahamas dia 27 di october y e manifestantenan a ricibi su bishita. Algun di nan tabatin cartel cu e mensahe: “Paga nos loke boso debe nos.”
Durante un acto cu a tuma luga e mesun dia, Charles III a reconoce e sufrimento y inhusticianan di pasado. E monarca a describi cultura di e pais como algo cu a nace “for di scuridad” y a bisa cu ta corecto reconoce e sufrimento historico, mientras cu ta celebra logro di actualidad y traha riba oportunidad nobo pa futuro.
Tambe el a indica di ta consciente cu lidernan di gobierno di paisnan di Commonwealth afecta lo trata e asuntonan aki durante nan reunionnan na Anticua y Barbuda.
Pero no tur hende tabata satisfecho cu su declaracionnan. Segun e corant Daily Mirror, e Comite Nacional di Compensacion di Bahamas a considera cu e palabranan di e monarca no tabata na altura di loke husticia ta exigi.
Segun informacion publica, Charles III no lo ofrece un disculpa formal pa pasado colonial di Gran Britania, siguiendo conseho di Gobierno di Reino Uni.
Un gira entre celebracion y reclamonan historico
E gira real lo continua pa Guyana y Anticua y Barbuda, unda reina Camilla lo uni cu e monarca. E bishita ta combina actividad cultural y encuentro oficial cu un debate cu ta persisti tocante responsabilidad historico, reconocimento di inhusticia y demanda pa compensacion pa sclavitud.
Mientras cu e imagennan di e rey bailando na Bahamas ta circula riba rednan social, e discusion tocante con e monarkia Britanico mester trata e pasado aki ta ocupa un luga central den su recorido pa Caribe.
