Aruba a tuma un paso pa explora un alianza strategico cu e club di futbol Hulandes PSV. Durante un encuentro na Eindhoven, a firma un Letter of Intent entre PSV, representa pa su director comercial Frans Janssen, Aruba Tourism Authority (ATA), representa pa Ronella Croes, y Minister di Turismo, Labor y Transporte, mr. Wendrick Cicilia.
Segun Minister Cicilia, e Letter of Intent ta duna ATA un periodo di un luna di exclusividad pa negocia cu PSV. E meta ta pa yega na un acuerdo den cual Aruba por bira partner oficial di branding y e unico destinacion turistico como partner di e club.
E firmamento ta marca e inicio di e negociacionnan exclusivo. E condicionnan definitivo, alcance di e colaboracion y derechonan di promocion ainda mester wordo acorda entre e partidonan.
Mas cu visibilidad den futbol
Minister Cicilia a splica cu e iniciativa ta busca pa posiciona Aruba hunto cu un club cu reconocimiento internacional y presencia riba e escenario Europeo di futbol. E plataforma di PSV por ofrece oportunidadnan pa amplia e reconocimiento di Aruba den e mercado Hulandes y otro mercadonan na Europa.
Entre e posibilidadnan cu ta forma parti di e negociacion tin visibilidad di Aruba durante weganan di PSV, ademas di e posibilidad pa inclui e marca y logo di Aruba riba e uniform oficial di e ekipo. E opcionnan aki ta suheto na e acuerdo cu finalmente por wordo alcanza.
Pa e minister, e balor di e acercamento ta bay mas leu cu publicidad deportivo. E intencion ta pa uza e relacion cu PSV como un porta pa conecta Aruba cu un red di companianan, profesionalnan y potencial bishitantenan cu un poder adkisitivo halto.
Conexion cu Brainport Eindhoven
Un aspecto central di e iniciativa ta e conexion cu Brainport Eindhoven, e region tecnologico den cual PSV ta profundamente conecta. E region ta conoci pa su ecosistema di innovacion, cu companianan manera ASML y Philips, institucionnan di enseñansa y profesionalnan specialisa.
Segun Minister Cicilia, un partnership cu PSV por acerca Aruba na e comunidad empresarial y tecnologico aki. Esaki por crea oportunidadnan pa presenta e isla cerca gerentenan, doñonan di compania y profesionalnan cu ta forma parti di e red rond di e club.
E acercamento ta forma parti di e obhetivo pa genera interes cerca bishitantenan cu por aporta un balor economico halto na Aruba, incluyendo pa e sector hotelero, restaurantnan y otro negoshinan relaciona cu turismo.
Un luna pa defini e siguiente paso
Durante e periodo di exclusividad, ATA y PSV lo por profundisa den e posibilidadnan comercial y promocional di e alianza. E negociacionnan mester determina con lo presenta Aruba, cua plataformanan lo ta disponibel y cua compromisonan cada parti lo asumi.
Cu e Letter of Intent, e partidonan a expresa nan intencion pa sigui traha riba un posibel partnership. Pa Aruba, e meta ta pa combina e alcance internacional di futbol cu acceso na e red empresarial di Eindhoven, buscando pa converti e visibilidad den interes concreto pa bishita nos isla.
Tocante e ekipo di futbol PSV
PSV ta hopi conecta cu historia di e ciudad Eindhoven y e compania Philips. E nomber ta significa Philips Sport Vereniging. A funda e club dia 31 di augustus 1913, originalmente como un asociacion deportivo pa empleadonan di Philips.
PSV ta conoci pa su exitonan y pa desaroya hungadonan cu despues a bira streyanan internacional. Entre e nombernan grandi cu a bisti su camisa tin Romario, Ronaldo, Ruud van Nistelrooy, Arjen Robben y Mark van Bommel.
Su temporada mas glorioso tabata aña 1987–1988. Bao direccion di entrenado Guus Hiddink, PSV a gana campeonato di Hulanda, copa nacional y Europa Cup I, e antecesor di Champions League. E club tambe a gana UEFA Cup na aña 1978.
Philips Stadion
E stadion tin capacidad pa aproximadamente 35.000 persona y ta situa na Frederiklaan, cerca di e centro di Eindhoven. Un detaye special ta cu PSV ainda ta hunga riba e mesun tereno caminda su antecesor, Philips Elftal, a hunga su prome wega na aña 1911. E stadion a cambia y crece enormemente rond di e luga historico aki.
E tribunanan ta cerca di veld, loke ta contribui na un ambiente intenso durante partidonan. PSV tambe a presenta plannan pa amplia e stadion pa entre 52.000 y 58.500 asiento; esaki ta un proyecto di ampliacion, no e capacidad actual.
