Mario Torruco, atleta Mexicano di 28 aña cu tabata representa su pais na e IF3 Masters World Championship Aruba 2026, a fayece despues di sufri un emergencia medico durante e prome dia di competencia, 23 di october, na Aruba. Torruco tabata participa den categoria masculino di 30 te 34 aña. Su fayecimento a wordo confirma dia 28 di october, segun medionan di comunicacion Mexicano a informa.
E atleta, kende tabata biba y traha como coach di fitness na Puebla, a bira malo durante e prueba di resistencia (Endurance Test), un recorido di aproximadamente dos kilometer den e area di e ruinanan di Bushiribana. Segun testimonio publica door di deportistanan cu tabata participa den e mesun prueba, Torruco a perde conocemento ora cu e tabata cerca di 500 meter di e liña di yegada. Otro competidonan a interumpi nan competencia pa yuda e atleta.
E relato di e sucesonan tin diferente version. Su pareha, Diana Burrola, a declara cu Torruco no a ricibi asistencia di prome auxilio na e momento cu el a bira malo y cu otro competidonan a yuda pa atend’e. Un representante di IF3, na otro banda, a informa na medionan di comunicacion internacional cu tabatin un ekipo di paramedico presente, cu a atende Torruco n’e sitio, pone na aw’i bida y despues transport’e den ambulance pa Hospital Horacio Oduber.
Na Hospital Horacio Oduber, e atleta a ricibi tratamento pa complicacionnan grave cu tabata afecta su higra y riñonnan. Un campaña di GoFundMe a wordo habri pa yuda cubri gastonan medico, estadia di famia na Aruba y un posibel traslado medico pa Mexico. E informacion publica riba e campaña ainda tabata bisa cu Torruco tabata hospitalisa y cu su condicion tabata delicado. Reportahe posterior di Mexico a confirma cu e a fayece dia 28 di october.
Pregunta tocante asistencia medico
Despues di e tragedia, algun participante a cuestiona e nivel di asistencia medico durante e prueba di resistencia. Segun declaracionnan publica, algun atleta no a mira personal di organisacion of boluntario den diferente parti di e ruta. Un participante a relata cu tabatin dificultad pa yama atencion ora cu Torruco a cay. Tambe a surgi pregunta tocante señalnan di e recorido y e presencia di personal medico na e diferente puntonan di e prueba.
Pareha di Torruco, den un video publica riba e plataforma X a denuncia cu e organisacion Mexico Funcional Federacion a mand’e Aruba sin seguro medico.
Declaracion di iF3
IF3 a duna un version diferente. Un representante di e federacion a bisa cu tabatin personal medico na e evento, incluyendo un ekipo di paramedico, punto di asistencia na e ruta y un trailer cu airco pa duna prome auxilio. E declaracion aki ta contrasta cu e experiencia relata pa algun competido.
E competencia a sigui durante e dianan di diasabra y diadomingo, a pesar di e emergencia medico cu a pasa riba e prome dia. E campeonato a reuni atletanan Master di diferente pais y categoria di edad, y Aruba tabata anfitrion di e evento internacional di 22 te 25 di october.
Famia ta pidi apoyo
Na Mexico, famia, amigonan y miembro di e comunidad deportivo a expresa nan tristesa pa e fayecimento di Torruco. Su tata a comparti un mensahe di despedida riba red social, mientras cu famia y conocinan a organisa un campaña pa reuni fondo pa cubri gastonan pendiente y pa transporta su restonan di Aruba pa Puebla.
Mario Torruco tabata conoci den comunidad di fitness di Puebla como atleta y entrenador. Su participacion na e campeonato mundial na Aruba tabata un oportunidad pa representa Mexico den un competencia internacional. Su fayecimento a laga un impacto entre deportistanan cu a participa den e evento y den comunidad deportivo cu e tabata forma parti di dje.
Calor extremo durante e competencia
Atletanan presente a relata cu e temperatura na Aruba tabata extremadamente halto riba diabierna, 23 di october. Un di e atletanan a calcula cu e calor tabata cerca di 40 grado Celsius, ekivalente na aproximadamente 100 grado Fahrenheit. Otro atleta a bisa cu e tabata sinti nervioso pa e idea di tin cu core den e calor intenso.
E atleta a conta cu, ora cu e a sali for di su auto, el a mira un ambulance saliendo for di e area di salida y yegada, cu su sirena cendi. Na e momento ey, su prome reaccion tabata di sinti alivio pasobra el a considera cu tabatin asistencia medico presente na e evento.
Sinembargo, mirando bek riba e situacion despues di e tragedia, e atleta a bisa cu awor e ta kere cu e ambulance probablemente tabata transportando un participante cu, segun e informacion cu a circula, a cay den otro durante e recorido.
Den e caso di Mario Torruco, kende tabata competi den categoria masculino di 30 te 34 aña, su grupo tabata e ultimo heat di e dia. E prueba tabata programa pa e parti memey di atardi, precisamente durante e periodo di dia cu normalmente tin e temperatura mas halto.
E testimonio aki ta agrega un elemento importante na e preguntanan cu a surgi despues di e emergencia medico: e condicionnan di calor extremo durante e prueba, e orario cu e competencia a tuma luga y e disponibilidad di asistencia medico na e recorido. Sinembargo, e testimonio di e atleta no ta confirma, por si so, cu calor tabata e causa di e emergencia medico cu Torruco a sufri.
Competencia a sigui apesar di emergencia medico
A pesar di e emergencia medico cu a tuma luga riba e prome dia di competencia, e iF3 Masters World Championship a sigui segun programa. E competencia a continua durante diasabra y diadomingo, 24 y 25 di october.
Atletanan cu a participa den e campeonato a declara cu, durante e resto di e fin di siman, nan no a ricibi ningun informacion of actualisacion di parti di e organisadonan tocante na e condicion di Mario Torruco. Segun nan relato, no a wordo comparti ningun comunicacion pa informa e competidonan con e situacion di e atleta Mexicano tabata desaroyando despues cu el a wordo transporta pa hospital.
E falta di informacion a laga participante sin sa con e estado di salud di Torruco tabata, mientras cu e campeonato internacional a sigui cu su diferente pruebanan.
Te na momento di publicacion di e reportahe original, ni e International Functional Fitness Federation (iF3) ni e organisacion local F3 Aruba a publica un declaracion oficial tocante na e emergencia medico cu a pasa durante e competencia, ni tocante na e circunstancianan alrededor di e incidente.
E ausencia di un comunicado oficial ta laga pregunta importante pendiente tocante e maneho di e emergencia, e comunicacion cu e atletanan y e medida di siguridad medico durante e evento.
