Pa medio di e publicación aki Minister di Finanzas, Asuntonan Economico y Cultura mr. Xiomara Ruiz-Maduro, ta anuncia cambio relaciona cu e prijsnan di venta pa combustible entrante diaranson 9 di mei 2018.
Esaki ta debi cu prijs di crudo riba mercado internacional a subi y basa riba e prijsnan promedio di Platts US Marketscan (Gulf Coast) pa e periodo di 1 te cu 30 di april 2018 tin e siguiente cambionan.
*”Prijs di crudo riba mercado internacional ta aumenta”:
Segun informacion ricibi di Departamento di Asuntonan Economico, Comercio y Industria, e mandatario ta trece siguientemente un splicacion di e aumento di prijsnan di productonan petrolero pa 9 di mei, na rason di postings di Platts US Marketscan e prijsnan di productonan petrolero a aumenta cu 7,0 cent pa litro pa gasoline y 7,3 cent pa litro pa diesel, esaki a rais di e aumento di prijs di crudo riba mercado internacional. No tabata tin cambio den ningun di e otro componentenan pa calculacion di e prijsnan maximo pa e luna di mei.
*”Metodo di calculacion di prijs Aruba y Corsou”:
Na Aruba adaptacion di calculacion di prijsnan maximo pa productonan petrolero ta sosode tur di dos diaranzon di luna. E calculacion di prijsnan maximo pa productonan petrolero ta sosode a base di informacion obteni di publicacion di postings di Platts US Marketscan, cual ta a base di prijsnan di productonan petrolero rafina, anota internacionalmente. A base di Marketscan ta tuma un averahe di e posting di e dia ey, pa despues na final di luna saca e averahe mensual. Pa calculacion di prijsnan maximo pa productonan petrolero di un luna, ta haci uzo di e averahe di postings di e luna anterior. Contrario cu Korsou e calculacion di prijs maximo pa productonan petrolero pa e siguiente luna ta basa riba prijs di compra riba factura di e luna anterior, cu e consecuencia cu e prijs local ta core dos luna atrasa compara cu e prijs nota riba mercado internacional. Den un siguiente articulo nos lo amplia mas riba e calculacion di prijs maximo di productonan petrolero na Corsou.
*”Componentenan pa calcula prijs di productonan petrolero”:
Bolbiendo bek na Aruba, e componentenan pa calculacion di e prijsnan pa productonan petrolero ta e “average monthly postings”, gastonan di transporte, seguro, perdida pa medio di evaporacion (verdamping), accijns, margen di mayorista y detayista, BBO y BAZV. Tambe tin un componente di subsidio pa mantene e prijs di LPG (gas pa cushina) abao. Casi tur componente den e structura di prijs ta absoluto.
E desaroyo di prijs di productonan petrolero rafina no ta igual na e desaroyo di prijsnan pa bari di azeta crudo. Prijs di productonan petrolero rafina ta refleha 4 componente:
1. Prijs di azeta crudo; 2. Gastonan di rafinacion y margen di ganashi; 3. Gastonan di distribucion y benta y margen di ganashi; 4. Impuesto.
*”Pronosticonan ta premira cu prijs lo baha na october”:
Segun pronosticonan pa 2018 di EIA (U.S. Energy Information Administration) pa e temporada di zomer, chofernan na Merca lo mester paga un averahe di Afl. 2.42 mas pa litro pa prijs di gasolin, esaki ta e averahe prijs di benta mas halto pa e ultimo 4 añanan y esaki ta basa grandemente pa e cambionan di prijs di crudo. Siguiendo e pronosticonan na october proximo ta premira cu prijs di productonanan petrolero lo bay conoce un reduccion.
