Diahuebs atardi, Minister di Finanzas, Asuntonan Economico y Cultura Xiomara Ruiz-Maduro, den nomber di Gabinete Wever-Croes a entrega Presupuesto 2018 na Parlamento. Esaki ta e prome Presupuesto cu Gabinete Wever-Croes ta entrega na Parlamento.
Den Presupuesto 2018, e mandatario a indica cu lo tin un nota di cambio den dje den cua ta presenta e informacion cu CFT a trece 2 di maart ultimo. Esaki ta e comentarionan riba e concepto cua a tene cuenta cu nan debidamente den e nota di cambio aki.
Un presupuesto cu ta conta cu un deficit di 3 porciento cu ta 150 miyon florin. Esaki ta bou di e 3.1 porciento di deficit di 2017 cumpliendo asina cu e recomendacion y of e comentario di CFT den e parti aki.
Minister Ruiz-Maduro a anuncia cu Presupuesto 2018 ta conoce inversionnan tambe. Gobierno ta kere cu como pais mester mustra curashi pa na e banda fiscal tuma e pasonan cu tin cu tuma pa yega na un situacion finaciero manehabel pa e pais haciendo lo corecto. Na e banda di gastonan tambe nos a cumpli pa baha esakinan pa loke ta trata operacion di Gobierno. Banda di esakinan, Gobierno a percura tambe pa inversionnan necesario pa nos pais.
- Lo haci inversionnan social. Pasobra nos tur ta mira e situacion social explosivo di nos pais den e ultimo añanan. • Lo haci inversionnan den infrastructura. Casnan social cu tin mester tin fondo aloca pa esaki. • Lo haci inversionnan den siguridad. Un pais sigur ta duna e siguransa pa su pueblo y pa turismo cu na e momento aki ta nos unico pilar economico.
Aruba a sali for di un crecemento economico di un porciento cua ta uno hopi modera. Esaki tin di haber cu e hecho cu e refineria, e trabounan di Citgo no a avansa manera a wordo premira. E daño ta hinca caba den Presupuesto 2017 pa cua motibo den 2018 nos no ta conta cu e parti aki y ta traduci su mes den un crecemento hopi modera of conservativo di un porciento.
Diahuebs atardi, Gobernador di Aruba Alfonso Boekhoudt a firma Presupuesto 2018 y awo esaki ta na Parlamento. Parlamento awo tin e tarea di studia e presupuesto, traha riba nan preguntanan pa asina pronto Presupuesto 2018 por wordo trata y aproba.
Deadline pa esaki ta dia 30 di april proximo. Ora cu ta maneha un pais cu responsabilidad, tin cierto tempo pa traha via ley haciendo uzo di cifranan di Presupuesto 2017. Y despues di esaki mester tin un apoderacion di Parlamento di Aruba pa por sigui cu e gastonan y sigur cu e gastonan di inversionnan necesario pa cua mester tin un presupuesto cla y aproba.
Minister Ruiz-Maduro ta bisa cu banda di esaki pais Aruba mester subi Mercado Internacional tambe pa busca fondonan necesario pa lora gobernacion di nos pais pa cua nos tin mester aprobacion di Conseho di Minister di Reino.
Esakinan ta e procesonan cu tin cu cana. Procesonan cu a cuminsa desde e prome dia di Gabinete Wever-Croes apesar di e traspaso caotico cu tabata tin. E muchachadanan di Mike Eman pa laga Bestuurkantoor den mal estado, sin telefoon, sin computer, sin data, no a stroba Gabinete Wever-Croes traha y cuminsa e gobernacion drechi pa nos pais.
Gobierno di Aruba ta asumiendo su responsabilidad con duro cu esaki por tabata, nos a cumpli y ta duna cara na pueblo, sin sconde. Nos a entrega un presupuesto cu no a wordo manipula. Un presupuesto realistico.
Gobierno di Aruba ta keda en espera e fecha na unda Presupuesto 2018 lo wordo trata na Parlamento y tur preguntanan cu Parlamento y pueblo tin por wordo contesta debidamente.
