Dia 16 di october 2026 Centro di Bario Noord lo ta e punto di encuentro pa un dia yen di enseñansa, consciencia y participacion comunitario, den ocasion di Dia Mundial di Agricultura y Alimentacion. E actividadnan ta prepara pa muchanan, mayornan y famianan cu tin interes pa siña mas tocante agricultura, alimentacion y e importancia di siguridad di alimento.
E iniciativa ta enfatisa cu agricultura ta un parti importante di nos bida diario y manera cu nos por construi un futuro mas saludabel y sostenibel. Door di educa tanto nos muchanan como nos mayornan, nos por crea mas consciencia tocante di unda nos alimento ta bini y e importancia di tin acceso na alimento saludabel.
Tayer di agricultura pa muchanan
Durante mainta, muchanan entre 5 y 12 aña ta invita pa participa den un tayer educativo y interactivo. E actividad lo tuma luga di 9:00 di mainta te 11:00 di mainta, y ta ofrece e muchanan un oportunidad pa descubri nivel basico di plantamento di berdura y fruta.
Cu un contribucion di solamente Afl. 3,50 pa cada mucha, e tayer ta enfoca riba enseñansa di un manera practico y creativo. E muchanan lo por siña mas tocante e proceso di planta, crecemento y cuido di cultivo, mientras nan ta descubri e balor di agricultura y di produci nos propio alimento.
E tipo di experiencia por yuda planta e simianan di consciencia ambiental desde trempan di edad, mientras ta fortalece e curiosidad y e interes di muchanan pa naturalesa y alimentacion saludabel.
Tayer y dialogo pa mayornan
Atardi, e programa ta continua cu un tayer y dialogo pa mayornan, cu lo tuma luga di 3:00 t’e 5:00 di atardi. E actividad ta un oportunidad pa mayornan tuma un momento pa reflexiona y informa nan mes mas bon tocante e significado di “Dia Mundial di Agricultura y Alimentacion.”
E participacion tin un contribucion di Afl. 15,00 pa cada mayor. E dialogo ta busca crea un espacio pa comparti conocemento, intercambia idea y aumenta consciencia tocante e rol cu cada persona y comunidad tin pa promove un sistema di alimentacion mas sigur y saludabel.
For di 10:00 AM pa 2:00 PM comunidad di Aruba por bin descubri y disfruta di un variedad di mata, fruta, berdura y hopi mas, tur fresco y, naturalmente, “LOCAL”!
Hunto pa un futuro mas sigur y saludabel
E Dia Mundial di Agricultura y Alimentacion ta brinda un oportunidad pa henter famia participa den un experiencia educativo y significativo. Door di involucra tanto muchanan como mayornan, e actividadnan ta invita nos comunidad pa pensa riba su importancia. E organisadonan ta haci un yamada na famianan pa bin participa, siña y comparti hunto. Hunto nos por planta e simianan pa un futuro mas sigur, saludabel y consciente.
Fecha: Diabierna 16 di october 2026
Luga: Centro di Bario Noord
Tayer pa mucha: 9:00 a.m. – 11:00 a.m. | Afl. 3,50
Tayer y dialogo pa mayor: 3:00 p.m. – 5:00 p.m. | Afl. 15,00
