Fraccion di MEP a presenta dos mocion y un amienda durante e reunion pa e prome presupuesto di Fondo General di Inversion y Desaroyo, conoci como AIOF den sala di Parlamento di Aruba. Na final, ningun di e mocionnan ni e amienda a pasa. E prome mocion a termina 9 voto pro y 11 contra. El a termina cu 20 voto pasobra Rocco Tjon no tabata den sala ora di votacion. E di dos mocion a termina cu 8 voto pro y 11 contra, mientras cu e amienda tabatin 8 voto pro pero 11 contra, cu consecuencia cu nan no a pasa. E cantidad a baha pasobra Mike de Meza a bandona sala y no a keda mas pa votacion.
A sigui despues votacion pa e ley mes di AIOF, despues di dos dia di debatenan largo den Parlamento di Aruba di mainta te atardi of anochi. Na final, e resultado di votacion ta 11 voto na fabor y 7 voto contra, cu a pone cu e ley a pasa cu un mayoria limita, faltando tres miembro cu a abstene di voto.
Mike de Meza pro MEP pero no p’e ley
Durante e motivacion di votamento, parlamentario di Fraccion di AVP, Ing. Mike de Meza, a anuncia di antemano cu un aña pasa caba a bin cu un mocion di desconfiansa contra Minister Gerlien Croes. E tempo ey el a considera cu oposicion tabata mucho trempan. Pero awor, mas cu un aña despues, si ainda Gerlien Croes no ta contesta parlamento, awo si e ta haya cu e asunto ta di mas y a sostene e mocion pa obliga e mandatario pa duna contesta. Ni asina mes e mocion no a pasa pasobra oposicion cu De Meza hunto a yega solamente 9 en bes di 11. Rocco Tjon no tabata na parlamento ora di votacion, cu a manca nan posicion y intencion mas ainda.
Mike de Meza a vota solamente pa e mocion # 1 di MEP y despues, manera semper, a bandona e reunion y a bay cas pa no mester vota pa e otro mocion ni amienda ni tampoco e ley, cu tambe el a anuncia di antemano di lo ta contra. Solamente cu el a opta pa no vota contra sino abstene.
Ruthlin Lindor a vota robes
Na momento di vota pa e ley principal mes, Parlamentarioa Ruthlin Lindor di e fraccion di FUTURO a vota contra e ley di su mesun Minister Geoffrey Wever. Probablemente oranan largo y cansancio lo a ocasiona esaki. Mesora el a corigi su mes y a cambia su voto pa “pro”. Oposicion a keha cu e no por cambia su voto mas despues di a vota caba, pero den pasado varios otro parlamentario a yega di comete e mesun eror y a corigi mesora prome cu votacion sigui.
E ley di AIOF
Durante dos dia largo, Gobierno di Aruba a presenta na Parlamento un proyecto di ley pa fiha e prome presupuesto di e Fondo General di Inversion y Desaroyo, conoci como AIOF, pa e añanan 2026 y 2027. E proposicion ta contempla Afl. 59 miyon na inversionnan den infrastructura, scol, vivienda, modernisacion di departamento publico y mehoracion di bario.
Cu e fondo, Gobierno kier crea un sistema pa financia proyecto cu ta tuma mas cu un aña pa completa. E meta ta pa duna continuidad na inversionnan publico, fortalece economia y contribui na un miho calidad di bida den tur districto.
Un fondo cu su propio base legal
Segun e documento, e ley di 9 di juli 2026, publica den Afkondigingsblad como AB 2026 no. 16, a establece e fondo. E proyecto cu Gobierno ta presenta awor ta trata su prome presupuesto pa 2026 y 2027.
E AIOF ta forma parti di e presupuesto di Pais, pero ta conta cu un destino specifico: financia of co-financia proyecto di inversion cu ta contribui na diversificacion economico, desaroyo sostenibel y mehoracion di costo di bida.
Gobierno ta indica cu e fondo mester yuda reduci gradualmente e dependencia di Aruba di un economia concentra den un solo sector. E marco di inversion ta contempla, entre otro, educacion, innovacion, agricultura comercial, tecnologia financiero, industria creativo y economia azul.
Proposicion miyonario
E presupuesto presenta ta inclui Afl. 35,716 miyon procedente di e di dos cambio di presupuesto di 2025 y Afl. 7,390 miyon di e presupuesto di aña 2026.
Gobierno ta splica cu e suma di 2025 ta relaciona cu placa reserva pa inversionnan cu ainda no tabatin obligacion financiero. E saldo inicial di e fondo tin un caracter provisional, pendiente di aprobacion di e cuenta anual di 2025 door di Parlamento.
E proposicion ta reparti e inversionnan den cuater area principal: Afl. 9,921 miyon pa digitalisacion y fortalecimiento di e aparato publico; Afl. 8,236 miyon pa renobacion urbano y regional; Afl. 6,310 miyon pa transicion energetico y resistencia contra cambio climatico y Afl. 18,638 miyon pa vivienda sostenibel y infrastructura.
Caminda, scol y mehoracion di bario
Entre e proyecto mas grandi tin un plan di mantencion di caminda pa varios aña, cu Afl. 9,929 miyon. Tambe tin Afl. 2,5 miyon pa asfalta caminda di tera existente y Afl. 2,914 miyon pa mehora acceso na Sero Colorado.
Pa educacion, e proposicion ta contempla Afl. 2,825 miyon pa renobacion di Reina Beatrix School y Afl. 470 mil pa dos lokaal di les pa SVGA.
E lista ta inclui ademas Afl. 5,136 miyon pa embeyece e barionan di FCCA na De Vuyst y Bushiri, Afl. 3,1 miyon pa MFA San Nicolas y Afl. 5,873 miyon pa e di dos fase di e proyecto di cubrimento na Parkietenbos.
Otro inversionnan ta relaciona cu renobacion di Arubahuis, edificio y sistemanan di DRH, reemplaso di un boto di polis y ekipo di DOW.
Proyecto mester demostra resultado
Pa cualifica pa financiamento, proyecto mester conecta cu prioridad di Gobierno, demostra beneficio economico of social, uza placa publico eficientemente y conta cu garantia pa transparencia, follow-up y dunamento di cuenta.
E documento ta splica tambe cu, si ehecucion di un proyecto no cuminsa despues di tres aña consecutivo cu placa presupuesta, e suma corespondiente ta libera pa e fondo. E saldo positivo cu resulta di esaki mester destina na pago di prestamo di Pais.
Cu e AIOF, Gobierno ta busca un miho continuidad den inversion publico. E discusion parlamentario di su prome presupuesto ta pone atencion riba tanto e proyecto cu Aruba kier realisa como e manera cu Gobierno lo financia, controla y duna cuenta di nan.
Amienda: MEP ta propone Afl. 1 miyon pa FEPOH
Fraccion di MEP a presenta un amienda durante e reunion publico di Parlamento di Aruba awe, pa destina Afl. 1 miyon di e Fondo General di Inversion y Desaroyo (AIOF) na FEPOH. E proposicion ta busca fortalece e identificacion trempan y sosten pa muchanan cu tin un trastorno den desaroyo di idioma, conoci como TOS.
E amienda ta relaciona cu e presupuesto di e fondo pa e añanan 2026 y 2027. MEP ta propone saca e suma for di e plan di mantencion di caminda di DOW, reduciendo e di Afl. 7 miyon pa Afl. 6 miyon. Asina, e total di inversion di Afl. 59,502 miyon y e saldo di e fondo ta keda igual.
Actualmente, FEPOH ta ricibi un subsidio di Afl. 540.000. Segun e fundacion, e suma aki no ta suficiente pa cubri e necesidadnan actual y futuro. E amienda ta contempla inversionnan di un solo biaha cu efecto pa varios aña, incluyendo preparacion di un profesional den enseñansa como specialista den TOS, pa Aruba conta cu e conocemento aki di forma structural.
Mocion di MEP: “Jetlin” mester duna cuenta
Durante e reunion publico di Parlamento awe, den e tratamento di e presupuesto di Fondo General di Inversion y Desaroyo pa 2026 y 2027, a presenta un mocion pa exigi claridad di Minister Gerlien Croes tocante su vuelo priva di Aruba pa Corsou dia 19 di november 2025. Segun e mocion, e minister tabatin un vuelo paga caba pa e siguiente dia, mientras Parlamento ainda no a ricibi prueba di pago di e vuelo priva. E mocion ta urgi e minister pa, dentro di dos siman despues di su aprobacion, informa cuanto a paga, na ken a paga y riba ki dia, y presenta factura, recibo of prueba di transferencia pa substancia su contesta.
Mocion di MEP: Baha prijs di combustibel
Den un di dos mocion, fraccion di MEP ta pidi Gobierno pa reintroduci inmediatamente e compensacion riba prijs di gasolin y diesel pa resto di aña 2026, na un nivel comparabel cu e medida cu tabata vigente entre april y augustus. E fraccion ta argumenta cu, entre januari y september, prijs di gasolin a subi casi 39% y diesel casi 65%, cu consecuencia directo pa gastonan di famia, transporte y comestibel. MEP ta señala cu Gobierno a dedica Afl. 10 miyon pa e compensacion anterior y ta sostene cu e entradanan adicional di impuesto cu e aumentonan ta genera mester bolbe na consumidor pa proteha su poder di compra.
Raad van Advies ta cuestiona financiamento y planificacion
Raad van Advies a lansa varios pregunta riba e proposicion. Entre otro, e conseho ta cuestiona e base contabel pa transferi e Afl. 35,716 miyon di aña 2025 pa e fondo. Raad van Advies ta comparti e preocupacion di CAft cu e metodo aplica no ta completamente den liña cu e reglanan di presupuesto.
Den su reaccion, Gobierno ta defende cu e transferencia ta basa riba autorisacion explicito den e di dos cambio di presupuesto di aña 2025. Segun Gobierno, ta trata di placa cu parlamento a destina pa e fondo, cu un registro administrativo temporal mientras e marco legal tabata pendiente.
Raad van Advies tambe a señala un diferencia entre e Afl. 7,390 miyon menciona den e proposicion y e Afl. 2,583 miyon contempla den e proyecto di cambio di presupuesto di 2026. Cu e ultimo suma, e total lo yega Afl. 38,299 miyon.
Den su contestacion, Gobierno ta menciona e posibilidad di presenta un nota di cambio cu lo ahusta e financiamento total na Afl. 65,049 miyon, hunto cu cambio den prioridad y planificacion di proyecto. P’esey, e Afl. 43,1 miyon den e proposicion no mester considera como un suma final aproba.
