E trio ladron keto bay ta riba caya. Mester kita nan for di caya pasobra keto bay nan ta moviendo den un Kia Hatchback color blanco. Si bo mira nan riba caya den ora di marduga, paga tino.
Coy e number di auto. Ta trata di tres ladron. Un na stuur y dos den auto. Nan ta pasa controla e negoshinan. Despues di esey nan ta para e auto na un distancia, p’asina baha y comete ladronicia destruyendo negoshinan.
Un ehempel ta diadomingo marduga. E biaha aki a tuma turno na Italo Arubano na Cumana. Prome nan a pasa controla y despues a para e auto n’un distancia dilanti un hardware. E ladronnan a baha fo’i auto, crusa caminda. Mientrastanto e chauffeur a baha di auto pa controla e area, mientras e otro dos ladronnan ta comete e destruccion.
Nan a drenta e luga pa busca kico tur nan por horta den Italo Arubano. Nan a laga un daño grandi atras. Esaki no ta prome bes. Den luna di december ladronnan a drenta na Italo Arubano y probablemente ta e mesun nan. Of ta e mesun ladron cu ta afo y ta comete e actonan aki. A pasa pa di dos biaha y comete e ladronicia.
Desde december Cuerpo Tecnico Policial a priminti cu nan lo pasa pa coy fingerprint. Pero desde december 2025 nan no a pasa pa coy e fingerprint ora a haci e denuncia. E luga tin camara di siguridad y a graba henter e movecion di e ladronnan cu a drenta Italo Arubano.
Drenta Amistad Take Away
E dia prome, den ora di marduga, Amistad Take Away tambe a bira un di e luganan cu nan a horta. E mesun Kia Hatchback blanco haci e mesun modus operandus, a pasa tira bista, baha y manda baranca den e porta pa drenta. A bolter e luga y bay cu e cash register. Nan a bay cu 500 florin lagando un daño atras.
Comerciante disgusta
E comerciantenan ta disgusta. Nan ta rabia y ta spera cu autoridad pone man riba e ladronnan. Amistad Take Away ta un negoshi chikito cu e famia ta struggle pa duna servicio y sobrevivi den comunidad.
Pero ladron ta yega y kibra tur moral di comerciantenan di Aruba debi n’e actonan aki.
Nan ta tres ladron, di cual un ta stuur y dos ta baha. Nan ta pasa den Kia Hatchback color blanco. Ta pidi autoridad pa tira bista riba e auto y kita nan for di caya. Italo Arubano y Amistad Take Away tin camara y nan a capta tur movecion di e ladronnan. Tin prueba di loke ta pasando.
