Entrante prome di mei proximo, Winair lo forma parti di e programa special di Air France-KLM, esta “Flying Blue”. Di e manera aki e miembronan afilia pronto lo por acumula y uza nan miyanan den e vuelonan opera pa e aerolinea Caribense.
Inicialmente, e biaheronan lo por acumula y uza nan miyanan den vuelonan di Winair reserva den codigo comparti cu Air France of KLM, pero den e di cuater trimester di e aña aki lo ta posibel tambe pa hacie riba vuelonan “independiente” opera pa e aerolinea regional.
Director Ehecutivo di Winair, Michael Cleaver ta satisfecho cu e participacion den Flying Blue: “E ta un manera fantastico pa recompensa e fidelidad di e clientenan cu nos tin en comun,” el a afirma.
Winair ta un abreviacion di Windward Islands Airways International N.V., un aerolinea cu ta pertenece na Gobierno di Hulanda, cu base principal na Sint Maarten. Georges Greaux y Hippolyte Ledee a funda e aerolinea na aña 1961. Nan flota ta consisti di ocho avion cu ta bula pa diesseis diferente destinacion. Su oficina principal ta situa na Princess Juliana International Airport na Sint Maarten.
E programa di viahero frecuente di Air France-KLM, esta “Flying Blue”, ta permiti bo spaar miya dependiendo di e distancia cu bo bula, tarifa di e pasashi y e clase di servicio. Otro aerolineanan cu a adopta e programa Flying Blue ta inclui Air Europa, Kenya Airways, Aircalin y TAROM. Tambe por acumula miya di tur e demas companianan asocia den SkyTeam. Pa afilia na e programa ta gratis. Ta dividi e programa Flying Blue den cuater nivel, cu ta Explorer, Silver (SkyTeam Elite), Gold (SkyTeam Elite Plus) y Platinum (SkyTeam Elite Plus). Tambe tin nivelnan special, manera e Platinum For Life, Platinum Ultimate, ultimate platinum skipper, club2000 skipper (pa esunnan cu a haci algo special pa KLM).
