Diaranson, dia 17 di april ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña.
Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contracto despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
CEO di WEB Aruba, sr. Alfredo Koolman, a comenta riba importancia di e acuerdo bisando cu e proyecto ta representa un logro importante tanto pa WEB como pa nos isla Aruba. Segun Koolman, ‘E lo optimalisa significantemente WEB su capacidad di produccion di awa, sigurando cu nos lo por satisface e demanda pa awa di bebe di calidad halto actual y esun den futuro. Nos ta hopi orguyoso di ta suministra awa di calidad halto na nos comunidad y bishitantenan di nos isla. E planta nobo aki lo mantene y alabes engrandece nos confiabilidad y pagabel. “Mi kier gradici e team di WEB pa a maneha e proceso di seleccion y pa traha cu SSWG riba desaroyo di e proyecto aki culminando den un acuerdo entre WEB Aruba y Seven Seas Water Group.” Asina e CEO di WEB Aruba a bisa.
Henry Charrabé, CEO di Seven Seas Water Group, a expresa su entusiasmo pa colabora cu WEB Aruba, bisando cu nan ta sinti nan mes tremendamente honra di a wordo selecta pa provee awa di bebe fresco y confiabel na WEB Aruba den e proyecto historico aki. ‘E proyecto significante aki ta un di e ‘public desalination tenders’ mas grandi den Caribe den e ultimo decada. Nos ta hopi impresiona pa WEB su vision di termino largo y pa e team su compromiso pa cu calidad, seguridad y confiabilidad. Nos modelo di termino largo Water-as-a-Service® perfectamente ta alinea cu WEB su obhetivonan strategico y nos ta entusiasma pa fortifica nos posicion como un proveedor local solido y confiabel di awa potabel desalina den region.’ Asina e CEO di Seven Seas a expresa.
Tocante Seven Seas Water Group
Cu oficina principal na Tampa, cu operacion rond estadonan uni di Merca, Caribe y Latino America, Seven Seas Water Group (SSWG) pa anualmente ta entrega mas cu 20 biyon galon di awa na clientenan industrial, comercial, gubernamental, municipal y hotelero. SSWG ta diseña, construi, posee y opera, ta entrega instalacionnan nobo, of ta adkeri y upgrade instalacionnan existente, cu e meta di optimalisa e transferencia di riesgo di proyecto entre sectornan publico y priva. Cu un reputacion excelente den solucionnan decentralisa di tratamento di awa y awa residual, e enfoke di SSWG “Water-as-a-Service®” ta busca ayudo pa resolve e desafionan global di infraestructura di awa y awa residual. Pa mas informacion di Seven Seas Water Group: [email protected] or Leslie May at [email protected]
Tocante WEB Aruba
WEB ta produci awa pa isla di Aruba for di 1932 y a cuminsa produci energia pa e isla na 1958. E produccion averahe pa medio di desalinacion di awa di lama, pa dia ta ± 36.000 m3. WEB Aruba’s su laboratorio ISO 17025 acredita, ta mantene proceduranan estricto pa cumpli cu rekisitonan pa awa potabel y ta cumpli di tur forma cu standardnan di WHO. Ta pomp e awa potabel produci na WEB Aruba den 7 tanki di preservacion riba su propio terenonan. Ademas di e tankinan aki, ta existi 7 tanki di awa instala na puntonan strategico riba nos isla. E tankinan di distribucion tambe ta sirbi pa mantene e balans den presion di awa como cu nan ta situa riba topnan di sero cu elevacionnan cu ta varia di 60 pa 110 meter riba nivel di lama. Pa mas informacion, por fabor bishita www.webaruba.com.
