Un accidente basta fuerte a tuma luga na crusada di Zoutmanstraat band’i Lagoen ora cu dos vehiculo a bay impacta den otro y dos persona a resulta herida.
Den careda di 1:30 pm na oficina di 24ora.com por a sinti coriente a bay y bin como tambe scucha e impacto fuerte parti pafo cu a pone diferente colega sali na careda pa bay mira kico por a pasa. A bin topa cu e accidente meymey di e crusada di Lagoen
Un damita hoben na stuur di un Toyota Vitz (A-24646) no a para na e crusada y duna preferencia na e trafico biniendo di su banda drechi. E pickup Chevrolet Colorado shinishi (A-49587) no a sper’e, por poco el a bay cay den e Lagoen. E chauffeur di e pickup no por a baha di e vehiculo pasobra su e porta di auto tabata pega. A warda te ora polis a presenta pa asina bres e porta na su banda.
Adicional a bay ranca un palo di luz, cu a ranca e waya di coriente den e area cu tabata chispa sin stop. A aleha tur hende te na momento cu Elmar a presenta na e sitio. Ambulance a yega pa atende cu e dama den e pickup cu tabata mas herida cu e otro chauffeur, y un rato despues e di dos ambulance tambe a presenta.
Daño material tabata considerable. Un testigo den un otro auto a pasa den un susto grandi despues di a presencia tur cos na e crusada.
