Mientras cu un parti grandi di pueblo ta pasando hamber, mientras cu gobernantenan y miembronan di coalicion ta bringa pa no perde masha di nan salario, eyfo tin hopi hende pasando den momentonan dificil. Mayoria a opta pa busca un miho forma pa busca nan cuminda. Awe ta wardando dos siman caba pa un cambio of decision di Minister Andin Bikker y tambe Minister Chris Romero pa suavisa uzo di speargun.
Aki mester simplemente pone reglanan cla y esun cu faya ta perde su skopet y haya multa. Diadomingo dos hende homber a bay tira pisca pa nan come. Ora a yega Barcadera a haya Duana riba nan, cu a mira e skopet di tira pisca y a avisa Polis, kendenan a confisca ambos skopet. Probablemente nan ta haya un multa tambe. Ban spera cu Diamars si tin bon noticia pa e tirado di pisca. A priminti Diabierna pero nada no a pasa.
Pone regla pasobra caminda nan ta tira no tin hende ta snorkel pa wak coral. Caminda nan ta tira ta hende cu curashi ta busca nan cuminda. Hende cu awe ta drentando lama den areanan peligroso of bay baranca pa pisca ta hendenan cu kier busca cuminda pa nan mes y nan famia. Nan a scoge pa esey. No bisanan bay traha pasobra no tin trabou y pa awe placa a caba.
Mientrastanto mas y mas hende ta sin placa y cu hamber. Di otro banda ministernan cu salario di 10 mil y parlamentarionan di 8000 den nan man ta mata otro pa entrega entre 1000 cu 1500 florin. Y nan tin telefon paga y Ministernan tin auto gratis y gasolin tambe cubri cu placa di pueblo. Hopi tristo loke ta pasando na Aruba.
