Diadomingo, den oranan di atardi, avion DASH di Wardacosta cu ta patruya den Caribe, a bin topa cu un boto riba lama, mas of menos 130 miya nort di Aruba, cual ta basta leu. El a duna di conoce cu den e boto tabatin un persona den dje cu no ta duna señal di bida, segun director adhunto di operacion di punto di sosten di wardacosta na Aruba, Mark Solognier.
E ta sigui splica cu a base di esaki a saca Panter pa bay analisa e situacion. A yega den careda di atardi y despues di a haci un investigacion, personal di Panter a constata cu ta trata aki di nuebe cadaver ta drief den e boto.
Ta trata di curpanan haya den un estado di descomposicion hopi avansa, cual ta indica cu nan tabatin basta tempo caba morto riba lama.
Den e mesun rosea Solognier a splica cu a haci varios intento pa touw e boto bin cu ne Aruba. Nos tabata cla pa ricibi e boto aki, pero lastimamente door di e lama bruto cu tabatin na e momento ey y e circunstancianan rond di dje, a pone cu despues di varios intento cu Panter, e cabuya di e boto a kibra y no por a touw e boto mas.
E boto a sink, hunto cu e nuebe cadavernan den dje. Awor lo sigui un investigacion di parti di autoridadnan internacional pa por saca afo identidad di e mortonan y e boto mes. Wardacosta ta sospecha cu lo por ta un boto cu a sali for di Africa.
