Ta bisa cu tin muchanan cu a bin inscribi pa scol na Colegio EPI, a bin resulta cu nan a paga etc. y pero nan ta riba wachtlijst. Esaki a trece preocupacion cerca nan. Irayka Yanez di EPI a splica cu en berdad nan tin un procedura cu ta uno normal, unda cu nan ta habri inscripcion di tempran y ta pidi e studiantenan pa inscribi prome cu 1 di Mei, cual ta costa 40 florin. E inscripcion aki ta djis pa e scol por sa cuanto grupo por spera pa e aña escolar siguiente. Esey ta nifica cu por haya studiantenan tambe cu no tin diploma ainda, esta nan no a slaag. Esey kiermen cu ta tuma tur e inscripcionnan ey, nan ta bin riba un lista, ta forma klasnan y ora cu yena e klasnan, ta bin wachtlijst. E wachtlijst no kiermen cu e studiantenan ey ta keda afo, pero tin chens ainda cu e studiantenan cu a yena e klasnan cu nan, no a slaag. E ora e wachtlijst ta bin na vigor.
Den pasado a haya cu a forma klas y despues ta bin resulta cu e studiantenan no ta slaag, cu nan resultado final nan no ta logra pa yega EPI. Esey ta nifica cu nan ta cay afo e ora e klasnan ta keda bashi. Pesey ta trahando awor aki cu wachtlijst.
Espacio
Segun Yanez, normalmente ta forma e klasnan y muchanan cu ta riba lista di espera tambe ta yega pa drenta den e klas. Si no a asina, ta busca un solucion pa nan den un otro forma. Tin biaha tin cu manda nan na un nivel mas abao, pero esey kiermen nan por subi bek na e nivel cu nan tin mester. Pero normalmente ta forma e klasnan cu e studiantenan cu a inscribi.
Interes
E opleiding di Welzijn ta un di e opleidingnan mas popular entre e studiantenan, mirando cu e ta rekeri vaknan cu no ta exacto. Bo por drenta e opleiding ey sin cu bo tin por ehempel wiskunde, natuurkunde of scheikunde. E ora e ta bira tambe e opleiding mas pidi pa e studiantenan. Normalmente ta yena tres klas full y cu esey ta suficiente e ora pa e studiantenan. Cada klas ta consisti di 25 pa 26 studiante maximo.
Satisfecho
Awor aki ta tempran pa bisa di e resultadonan. E muchanan a caba di haci nan examenweek siman pasa y ta wardando resultado di e studiantenan. Riba su mes, cada aña e ta varia un tiki. Aña pasa tabata tin un bon aña toch cu un 78% di graduado, cual ta basta satisfecho cun’e.
Pa loke ta studiantenan, cada aña e ta bira mas y mas. Por wak’e tambe na e poblacion di Aruba ta creciento y esey ta nifica cu e poblacion di EPI tambe ta crece cada bes.
Chikito
E scol ta birando chikito. Tin hopi trailer riba tereno cu mester pone acerca pa por duna les. Tin falta di edificio pa e cantidad di studiante cu nan ta hayando.
Scol henter dia
Ta uzando e scolnan henter dia. Durante mainta ta uza e scol pa EPI mes. Merdia ta pa leerwerktraject y tambe avond MAVO ta uza e scol, como tambe scol di polis y enseñansa pa empleo.
Cuanto mucha
Na Colegio EPI tin 1900 studiante mas of menos ta atendiendo e scol. Mescos cu tur scol, ta haya e studiantenan cu ta laga scol tempran door di circunstancianan. Kisas nan mester cuminsa traha of a cuminsa un famia. Pero mayoria di e studiantenan ta logra caba e scol.
Opleiding
Welzijn y Horeca ta e dos unidadnan bon atendi como tambe facultad economia, segun Yanez.