E yegada di e vuelo inaugural di British Airways ta representa un era nobo pa Aruba su turismo, ya cu nos lo ta conectando directamente cu un di nos mercadonan di mas importante na Europa. Aruba ta presente den e mercado di Reino Uni desde 1997 y ta consistentemente e di dos mercado mas grandi pa Aruba den Europa.
“Nos a caba di regresa for di London, unda a reuni cu un delegacion amplio di ehecutivonan di British Airways cu ken nos a bin ta traha di cerca. Ambos partido ta contento di por a yega e punto aki y ta mira cu tin demanda pa Aruba y cu esaki lo simplemente sigui crece, principalmente considerando locual lo sigui despues di e dia di awe, unda lo amplia Aruba su promocion grandemente bou di clientenan di British Airways y den e mercado Britanico. Ta nota caba con e interes di e biahero afluente ta resalta. Esey ta pa corda nos cu Aruba ta un destinacion posiciona debidamente.” asina Ronella Croes, CEO di Aruba Tourism Authority a duna di conoce.
Un total di 13% di bishitantenan di Europa a bin for di Reino Uni na 2022 y ta spera cu na fin di 2023 esaki por yega 15%. Ta spera cu den e añanan nos dilanti, a traves di e conexion nobo cu British Airways lo por logra kibra e record di 21% di bishitante Europeo for di Reino Uni cu a wordo estableci na 2017.
Den transcurso di añanan Aruba a lansa diferente campaña y tawata tin diferente momento unico cu a sa di atrae atencion di tanto tour operador como consumidor. Algun di e mometonan mas memorabel tawata por ehempel promocion di Aruba riba London su taxi pretonan, den e underground metro system di London como tambe na Wimbledon. Awor e momento mas iconico for di e mercado di Reino Uni ta bira e vuelo di British Airways pa Aruba!
Den un encuesta reciente cu a midi comportacion di biahe di personanan na Reino Uni, 68% di participante a bisa cu nan a yega di tende di Aruba. Den e mesun encuesta, participantenan a comparti e criterianan di mas importante ora di soge un destino pa bishita. Limpiesa, siguridad, un entorno natural atractivo y personanan local cu ta demostra hospitalidad ta e criterianan principal. Na di 5 luga ta e acceso na vuelonan directo, algo cu awor lo haci Aruba mas accesibel y atractivo pa e mercado di Reino Uni.
British Airways lo ta bendiendo vuelo pa Aruba pero tambe lo ta bendiendo paketenan a traves di British Airways Holidays y otro tour operadornan. A.T.A., AAA, Ministerio di Turismo y socionan e.o. hotelero ta sostene e desaroyo aki mirando e contribucion cu esaki ta nifica pa Aruba su diversificacion y e oportunidad pa yega na socionan y cientenan nobo pa Aruba. Na e momento aki ta trahando riba un campaña di concientisacion pa Aruba den e mercado, cual lo ser lansa banda di locual ya ta coriendo den e mercado, incluyendo campaña intensivo cu British Airways. Hopi promocion adicional lo sigui durante e siguiente lunanan.
A.T.A. ta agradecido na tur persona cu a contribui pa haci e vuelo aki un realidad. Na e ekipo di AAA, A.T.A. na Aruba y Europa, e Hunta di Supervision di A.T.A., Ministerio di Turismo, AHATA y hopi otro. Danki pa e apoyo, trabao duro y e confiansa den e ruta nobo aki. Pabien Aruba!
