Diabierna dia 18 di december a tuma luga e reunion di Conseho di Minister di Reino den cual Aruba tabata riba agenda pa e sosten di likides cu nos a pidi pa januari, februari y maart 2021. Prome Minister mr. Evelyn Wever-Croes a splica cu a haci e peticion aki di algun siman pasa, el a pasa CAFT y e siman aki hunto cu Secretario di Estado Raymond Knops, a repasa tur e condicionnan cu Aruba mester a cumpli cu ne dia 15 di december.
Aruba ta riba e bon caminda pa cumpli cu tur e condicionnan y Knops a duna di conoce cu e ta satisfecho cu e forma responsabel con Aruba a atende cu e tema. Sinembargo ainda no ta cla cu tur cos, pero cu ya a tuma e pasonan necesario. Por parti e condicionnan di 15 di december den algun grupo:
- Enseñansa, e minister encarga mester a presenta un plan di con e lo bin cu restructuracion of ‘doorlichting’. Varios di nos propio hendenan a haci diferente estudio den pasado tocante con por cambia y mehora e sistema di enseñansa. Ta tuma tur e estudionan na consideracion y e minister a presenta con e lo hacie tambe.
- Financiero, minister di finansas mester a presenta con ta bay haci algun estudio pa mira e consolides den nos sector financiero.
- Husticia, con por yega na palabracion y protocol di cooperacion entre diferente autoridad hudicial. Pa por enfrenta criminalidad, ilegalidad y corupcion na un forma mas efectivo. Cual tambe a cumpli cu ne.
Hulanda tabata kier pa Aruba mustra con Aruba ta bay continua den aña 2021 cu e cortamento di salario cu a bin ta tumando luga e aña aki. Pa loke ta ambtenaar a mustra cu ya caba den e ley ta inclui cu e ta ‘tot nadere orde’. Mescos cu pa Ministernan tambe e ta ‘tot nadere orde’. A cambia e ley pa Parlamentarionan siman pasa y awo esey tambe ta ‘tot nadere orde’. Pues e institutonan publico (di Gobierno), a cumpli cu tur cos.
Pa loke ta e institutonan semi-publico, eseynan tambe a mustra Hulanda cu Gobierno a haci apelacion fuerte na cada un di e companianan, pa nan por fabor continua cu e entrega di salario pa e siguiente lunanan nos dilanti den 2021. Esaki ta un condicion di Hulanda, a splica esey den carta cu a manda na cada instituto semi publico, como muestra di solidaridad. E cortamento di salario awor ta un di e exigencianan di Hulanda y tur instituto estatal y semi publico a cumpli cu ne. A entrega e lista cual a wordo aproba.
E peticion cu Gobierno di Aruba a haci pa deposita e placa aki riba e fondo di FASE, no ta tur por a cumpli cu ne. Algun a pidi pa e placa keda den nan compania mes door cu e compania a haya menos entrada. Y awor aki pa 2021 a ripiti e mesun peticion na tur compania estatal y semi publico. Si e compania no por haci esey e lo mester bay den deliberacion cu minister y mira con ta sali afo, Premier Wever-Croes a splica cu Hulanda a keda satisfecho cu Aruba por a mustra cumplimento cu e condicionnan y pues nan a aproba e sosten di likides pa Aruba manera cu a pidie.
Door cu CFT no a finalisa tur e analisisnan financiero (door cu presupuesto 2021 di Aruba no a wordo entrega ainda). A tuma e decision cu Aruba lo haya un ‘voorschot’ riba e ‘likiditeit steun’ cu mester haya. E voorschot ta riba mita di e periodo (6 siman) cual ta di 1 di januari pa 12 di februari. Y prome cu 12 di februari lo trata e cifranan definitivo pa e prome kwartaal y henter aña 2021. Cu esaki Aruba ta haya e orto parti di e placa y ta sigura cu por sigui paga debenan, gastonan, FASE, loonsubsidie y sosten financiero cu ta duna na empresanan mediano y chikito.
Pa conclui, Prome Minister a haci apelacion na tur esnan cu ta traha den sector publico pa sigui contribui. E fiansa cu Aruba ta haya ta depende di bo aporte tambe. E situacion no ta facil pero tur hende mester hala faha mara, maske ta pa un tempo mas pa despues nos sali hunto for di e situacion di Covid-19.
