Tabata diadomingo atardi rond di 5:00pm cu a bati alarma na aeropuerto pa un pasahero Mericano cu a caba di yega nos isla abordo di United Airlines. El a drenta e terminal via jet-bridge pero mesora a habri un porta di emergencia, baha trapi y subi pista di aterisahe na careda. Trahadonan di aeropuerto a gar’e y a want’e te ora cu polis a yega pa bay cu ne.
Kico a motiva e homber Mericano cu a caba di yega Aruba for di Merca pa haci algo asina, no ta conoci ainda. Polis a deten’e y want’e den oficina te atardi laat despues cu e vuelo a sali bek y probablemente yega Merca bek sin ningun problema. A laga e pasahero test pa Covid-19 y despues a bay cu ne pa mira ki decision Sub Fiscal lo tuma pa cu su detencion y/of encarcelacion.
No ta conoci si siguridad di aeropuerto a activa mesora pero hecho ta cu ora habri un porta di emergencia, mesora den “Charlie Charlie”, cu ta e centro di comunicacion di Aruba Airport Authority, ta activa un alarma indicando esaki. Normalmente ta manda un miembro di siguridad na dicho porta pa mira ken a habrie y kico a sosode eynan.
Pero den e caso aki, e pasahero a logra habri e porta sin problema, baha subi rampa y na careda tabata bayendo abou direccion e kazerne di Brandweer y Aerocargo. Pero como cu e no tin uniform bisti, no tin vest bisti y tampoco por a mir’e cu un badge na garganta, cu e trahadonan di aerolinea y groundhandling mes a opta pa want’e mientras cu a bati alarma na Charlie Charlie, cu na su turno a spacha polisnan di control di frontera staciona na aeropuerto.
A boei e pasahero mesora y polis a constata cu e tabatin duct tape na su kedsnan. E motibo pa e movecion straño y vesturario misterioso tampoco no ta conoci ainda. Parce cu ora polis a bay interog’e, cu el a haci uzo di su derecho sagrado di silencio y no a contesta ningun pregunta cu a haci den su direccion. Ora opta pa no contesta pregunta di autoridad, hopi biaha Fiscal ta tuma e hecho aki na malo y probablemente ta scoge pa cera bo mientras bo ta evalua pa papia toch.
Den e caso aki, a opta pa wanta e homber te ora cu e avion a lanta bek pa Merca y sigura cu el a yega bon eynan, prome cu a bay cu ne for di aeropuerto. Specialmente e duct tape na pia y e coremento riba pista a percura pa hopi interogatorio riba kico lo por tabata su plan. Pero te cu por a ripara, tur cos tabata normal cu e vuelo, cu ta mustra mas bien cu e homber aki a bruha ora el a baha na Aruba y a opta pa haci un movecion masha misterioso mes.
