Diadomingo anochi a presenta un retraso den e vuelo di e aeroliña Wingo. E avion a haya problema tecnico na Bogota, Colombia. Door di e fayo tecnico a pone cu e vuelo a sali laat for di Colombia y consecuentemente a yega Aruba laat tambe, net durante Toque de Queda. Esey a pone cu taxistanan a duda si nan lo bay busca e pasaheronan pa nan no haya nan mes den problema cu husticia, mesun cos tambe famia cu mester a busca pasaheronan pa hiba cas.
E vuelo tabata programa pa yega Aruba 7:54 pm for di Bogota y mester a sali for di Aruba pa Bogota pa 8:54 pm. Pues, e pasaheronan biahando pa Colombia a check-in for di 6:00 pm caba pendiente nan salida. Awor nan a sali te marduga pa Colombia, haciendo cu nan a keda pega pa algun ora den aeropuerto di Aruba sperando e vuelo yega di Colombia. Mesun cos a sosode na aeropuerto El Dorado na Bogota, unda tambe esunnan rumbo pa Aruba a keda pega pa algun ora debi na un fayo tecnico cu e avion.
E vuelo P-7004 a trece no menos cu 160 pasahero abordo y tur di nan mester a yega nan destinacion final asina cu nan yega Aruba. Taxistanan a tuma contacto mesora cu polis, cu a brinda cooperacion. Cu intervencion di aeropuerto, a regla pa tur taxista por a haci nan trabou normal y tur famia por a busca nan ser keri sin haya problema cu polis den Toque de Queda.
Polis a splica nan si cu mester bay cas of hotel mesora despues di aeropuerto, pues no por tin keiromento. A corda tur hende cu tur luga ta cera den Toque de Queda, pues hotel so ta warda riba e pasaheronan of e residentenan por a djis subi auto bay cas. A pidi polisnan pa tin comprension pa e grupo aki den e prome oranan di Toque de Queda.
A tene cuenta cu ora yega Aruba, cu ainda lo tin tardamento pasobra separa cu mester pasa Migracion y Duana, tambe mester haci e PCR Test di DVG na aeropuerto ainda. Aunke cu aeropuerto no tabatin ningun otro vuelo na e momento ey, toch e procedura ta tuma su tempo.
Separa di e pasaheronan cu a yega Aruba for di Colombia, aeropuerto mester a warda tambe pa esunnan cu ta bayendo por a subi e avion trankil y bandona nos isla. No solamente e pasaheronan, sino e trahadonan di aeropuerto tambe mester por a yega cas trankil despues di spacha e vuelo pa Bogota.
