Diadomingo pa 9:00 pm tabatin un pelea entre un hende muhe y un hende homber net dilanti di Maria Lottery na Cura Cabay. Na yegada di polis a compronde cu e homber a yega cas hopi furioso. Hasta e señora tabatin su baby den man, ora e homber abusado a cuminsa agredie y a kibra varios cos den cas. Den e proceso, el a kibra e bentana patras di e auto marca Suzuki, modelo Swift, color blauw, cu tabata staciona den garashi di e cas.
Despues di ful su show, e homber a bandona e sitio y a bay su cas situa den Tulpenstraat na San Nicolas. Aki a notifica cu e mester ambulance na e sitio pa por ricibi asistencia medico, debi cu den e proceso pa agredi e señora, el a kibra of verzwik su man. El a bisa polis cu e ta sinti masha dolor mes na su man.
Sinembargo, polis a hala su atencion pisa, debi cu el a agredi e señora cu baby den su man. A splic’e cu asina no ta sistema di regla disputanan di famia. Y cu si e señora entrega keho, cu nan lo detene mesora na e sitio. Pero, manera sa sosode hopi biaha, e victima ta opta pa no keha e abusado y asina e ta liber sin problema, cla pa e siguiente escena di abuso atrobe.
