Como celebracion pa su 30 aña y tambe 15 aña como solista, e cantante Velo a dicidi di cuminsa cu un proyecto pa celebra durante aña 2021. E ta encera lansamento di produccionnan cu tin un toke diferente pero na mesun momento ta identifica su persona.
“Pa e motibo aki mi a dicidi tambe di cuminsa uza mi nomber artistico “Velo” como cu esaki ta un aña super special cu proyectonan grandi na caminda. Esaki ta djis e comienso pa Velo,” e artista Veloushka Krozendijk ta comenta. .
E Poder di mi Amor a wordo skirbi pa Jaderick Croes na e ocasion aki pa celebra cu 15 aña pasa e tabata e prome persona pa competi cu un composicion di su persona y a conkista e titulo maximo. E resto ta historia. Durante añanan cu a transcuri Jaderick a skirbi diferente composicion pa Velo. E poder di mi Amor ta un cancion pa recorda con tur cos a cuminsa pero cu un toke moderno y acustico. “Di e forma aki nos kier a demostra nos amor pa nos isla cu ta uno cu ta surpasa tur barera.”
Asina a acerca Reggie Curie (bahista Shine Music y DLS) pa produci e cancion aki. Jaderick a graba e guitara y tambe e guilele. E liña di coro a keda den bos di Juni Dirksz. Mix y Mastering a keda den man di Nigel Dream. E video artwork a keda den man di Elai Visuals y e photoshooting tabata den man di Jansen Studio. Asina E poder di mi amor” a haya bida.
Pueblo keda pendiente pa mas produccion.
