Diadomingo awo, dia 1 di november, Club Kibrahacha un biaha mas lo ta organisando nan grandioso Fundraising Bazaar. Esaki lo tuma luga rib’e tereno di club.
Su directora, Janely Nicolaas a indica cu e actividad lo cuminsa for di 10 or di mainta te cu 5 or di atardi y entrada ta completamente gratis.
Durante e dia, e publico presente por disfruta di diferente actividad, e.o, bingo, cual ta prome biaha cu nan lo organisa esaki. Tambe lo tin benta di mata y un gran variedad di productonan, obranan artesanal, bolo y diferente cuminda y bebida. Tambe lo tin e popular rommelmarkt, cu ta hopi gusta pa e bishitantenan. E publico por busca y cumpra diferente articulo na un bon prijs.
Musica
Mas cu clar, musica lo no por falta. Manera cu e portanan habri, musica lo resona te cu na final di e actividad. Durante henter e dia, e publico presente lo por gosa di e presentacion di Melodia, Kibrahacha Boys, Las Unicas, Robert Thiel y su banda, mientras Rincon Boys lo cera e programa musical.
Janely Nicolaas ta invita henter comunidad di Aruba pa bin disfruta di e actividad, pasa un dia agradabel hunto cu famia y amigo, y contribui na e iniciativa di fundraising di Club Kibrahacha.
