Despues di cu Crisis Team a informa riba locual ta e maneho nobo na frontera, pa evita entrada masivo di e variante Delta, a tuma nota cu tin cierto confucion. Pa aclaria esaki Crisis Team ta informa cu e maneho cu a reintroduci na frontera no ta completamente nobo, sino ta e mesun maneho cu tabatin caba. E maneho ta encera cu tur persona, sea residente of turista, cu yega Aruba for di un pais di risico, mester provee un test negativo. E persona por provee e test 72 ora prome y upload esaki of e persona por test ora e yega Aruba.
E diferencia ta cu esun cu upload su test, ta yega drenta Aruba sin restriccion, pero esun cu test na Aruba, mester bay su cas of hotel y warda den cuarentena pa resultado di e test. E resultado por dura maximo 24 ora. Despues cu e resultado di su test ta conoci, si e ta negativo, e residente of turista por continua cu su actividadnan normal di tur dia. Si e resultado ta positivo, e residente of turista ta keda isola y DVG hunto cu ATA lo percura pa e proceso aki.
Dus pa aclaria, no ta berdad cu un turista of residente na momento cu e drenta Aruba e mester bay den cuarentena 14 dia automaticamente. Esey no ta berdad! A implementa e maneho aki caba y a cambi’e algun siman atras pa facilita entrada di esunnan vacuna na Aruba. Pero mirando e situacion alarmante cu e variante Delta ta ocacionando den otro paisnan, Aruba ta tuma e medidanan necesario pa salvaguardia salud di comunidad y di nos economia. Ta den e cuadro aki ta reintroduci e maneho cu ya tabata vigente caba.
