Recientemente Minister di Husticia mr. Andin Bikker a firma un ‘Letter of Intent’ cu e Customs and Border Protection (CBP) di Merca. Ta trata aki di e cuerpo di Migracion y Duana Mericano, estableci na nos aeropuerto. E acuerdo di principio tin tres dimencion.
E prome dimension ta cu e sistemanan automatisa di control y maneho di nos frontera di Aruba den forma di e Radex, online ED-Card y pronto e ESTA di Aruba, lo por conecta riba e Automated Targeting System (ATS) di Merca (https://www.dhs.gov/publication/automated-targeting-system-ats-update).
ATS ta un sistema automatisa cu ta compara informacion di biahero, carga y di transferencia di ambos, cu e basenan di data di instancianan cu ta mantene y enforsa leynan y ta haci analisis di siguridad (‘risk-based scenarios and assessments’). Asina e lo yuda departamentonan cu ta controla y proteha nos frontera, manera Migracion Aruba, KPA, Duana, VDA, NCTVI y DIMAS, pa tin acceso na informacion mas amplio pa por eherce nan trabou.
Por ehempel ora cu activa e ESTA di Aruba, Migracion Aruba y DIMAS lo por haci uzo di e base di data di Merca pa por opera e ESTA di Aruba. Duana por ehempel lo ta bay tin mas informacion riba mobilisacion di carga y containernan cu ta destina pa yega Aruba.
Un di dos parti di e acuerdo di principio ta e uzo di ‘biometria’ a base di articulo 22-A nobo di e Ley di Admision y Expulsion (LTU), cu ta yuda pa e proceso di screening pa admision di turista wordo amplia cu e control di su identidad a base di su biometria (potret digital y fingerprint), cual lo aumenta e instrumentonan pa e departamentonan menciona ora di screening pa dicidi si ta admiti un biahero y na mes momento percura cu e turista por ta mas lihe na su hotel y riba beach, pa por disfruta di loke nos isla tin pa ofrece.
Finalmente e acuerdo di principio ta duna espacio pa Aruba haya mas asistencia den reconoce documentonan oficial, pues pa gara esunnan cu ta purba pasa cu paspoort falso.
Mester menciona cu e acuerdo aki, den opinion di Minister Andin Bikker, ta uno historico ya cu Merca ta e mercado principal di nos turismo. E mandatario tin bastante tempo caba trahando riba e tema. E Minister a propone y logra haci algun cambio den e ley di LTU (AB 2018 no. 70) y den e Toelatingsbesluit (AB 2020 no. 94) pa por tin un base huridico moderno y amplio cu ta cumpli cu exigencianan internacional y por aplica e uzo di tecnologia moderno den control na frontera.
Pa Minister Bikker, e meta primordial ta pa por tin miho control y siguridad, banda di eficiencia y rapidez pa e turista por pasa door di e proceso di control mas lihe posibel, pa rapidamente despues di aterisa na Aruba e por ta na su hotel of beach, disfrutando di loke nos isla tin di ofrece.
Manera menciona cu Merca ta e mercado principal di nos turismo, pues e mandatario ta convenci cu hopi mas acuerdo di cooperacion lo sigui entre e departamentonan Mericano y di Aruba, den interes mutuo pa garantisa siguridad di bishitantenan di ambos pais.