Mayornan no por wordo hinca den e plataforma di siguridad, pasobra nan no ta dunado di cuido. Den e programanan den e ultimo, a bin tienda por ehempel di educacion, segun minister di husticia, Arthur Dowers. Nan ta specialmente den servicio pa sostene famianan. Den e plataforma, door cu tur partido ta participa, ta haya cu ta atende cu e mucha cu ta forma un riesgo. Ta atende cu e sistema tambe. No ta asina cu ta trata un mucha so. Tin cu percura pa tin psicologo, psikiatra, otro terapeutanan eyden pa duna guia, pero tambe tin cu trata e sistema. E yiu no ta bira monster ora cu e nace, ta nos ta haci’e monster. Tin cu guia esnan tambe pa duna e muchanan loke e mester tin loke e crece. No ta algo facil.
Man duro cu crimen no sa kico esey ta nifica. Si comete un infraccion contra ley, ta cerabo. Y asina por keda menciona. Mas duro cu esey no tin. Pero un sistema cu a wordo daña pa hopi aña, mester bay na e base pa drech’e. Loke cu e plataforma aki por haci, ta señala e problemanan, pone guia specifico, e diferente teamnan ta hunto. Ora cu Dowers ta sinta cu e diferente teamnan, di biaha ta gara e toro na su cacho. Pesey hustamente ta pidi pa e plataforma aki ta institui y esnan cu a traha den e proyecto piloto ta sumamente contento cu e resultado y kier sigui participa.
Wit Gele Kruis ta forma parti di dje. Nan tin entrada na casi tur hende. Cada mucha cu nace, Wit gele Kruis ta na e cuna ey caba ta wak. E plataforma aki lo bay haci un diferencia. Aki 10 pa 15 aña lo mir’e, pero mester cuminsa un caminda, e mandatario a menciona.
Minister Dowers a splica cu tin hopi caminda na mundo, hopi hende no ta sinti nan mes sigur mas. Hopi hende no ta sinti nan mes safe mas na mundo pasobra hopi cos ta pasa na mundo. Bo ta kere cu tin hende ta sinti nan mes safe na Venezuela por ehempel? Ningun hende, segun Dowers. Solamente si nan ta forma parti di un grupo specifico. Nan ta exportando crimen rond Latino America y Caribe. Nan ta haciendo Caribe y Latino America hopi unsafe. Nan ta exportando arma. Por mira con ta parti arma na Venezuela. Si abo tin un hende cu no tin entrada, nan dunabo arma, bo ta bay bringa cu e hende? Bo ta bay bende e arma den Caribe. Esey ta parti di pakico un aumento di risico sumamente grandi, nunca bisto. Nunca den historia di Caribe y Latino America, no a conoce un riesgo asina grandi. Loke Gobierno ta haci ta manehe.
Si nos mira Corsou, nan a yega den un aña 50 y pico matamento. Nan a yega na 1000 atraco. Por bisa con hende ta bira asina. Si nos ta hopi menos, nos ta spanta. Imagina na un pais caminda cu e ta asina hopi. Realidad di bida ta, tin cierto factornan cu ta contribui na crimen. Nos por controla un parti di dje, door di inverti den nos hobennan, nos mesun hendenan y ta haci’endo esaki cu hopi miyon, bringando contra gruponan cu ta forma riesgo.
E gruponan aki ta wordo sosteni tambe pa nos mesun hendenan tambe, pero mester bringa nan tambe. Y ta hacie efectivamente.
Na Januari, por a tende algun hende cu ta yama nan mes periodista, ta cana broadcast cu tin 61 atraco. Den luna di Januari tabata tin 12 atraco, pero a soluciona 10 atraco den un paar di ora. A cera masha hende. A cera atracador plus netwerk di localnan cu tabata duna nan cas, auto, duna nan informacion di nos negoshinan. Cada biaha cu bay cu e hendenan cera, ta mira bandera di MEP, sticker di MEP pega riba e autonan cu ta haci e atraconan. A detene tambe esun yega na e partido politico mes. A bisa nan den Staten. Ta bay yega cerca di nan y nan a yega. Nan mes tabata bisa cu lo sali na cuanto atraco. E partido a haci propaganda pasobra nan a cuminsa na Januari cu ta haci hopi atraco. A dal nan tur cera y atraco a cay. Por priminti si cu na momento cu comete atraco, tin teamnan bon prepara y bon respeta cu lo coy e atracador cera.
