Cu 41 candidato pa pasa examen di MAVO entre dos klas, ta solamente un alumno no a logra slaag e aña aki. E lo pasa e aña un biaha mas, cu speransa cu otro aña si e lo slaag sin problema. Pero bisando esey, tur 40 otro studiante a slaag na Ceque College, cu ta representa un average di 98%…un di esunnan di mas halto e aña aki.
Clay Shipley, director di Ceque College MAVO a bira mira nos y agrega: “Pero aña pasa nos tabata 100%, pasobra na nos scol no tin wega, nos studiantenan ta disciplina y danki Dios nos ta conta cu bon cooperacion di mayornan pa forma un ekipo entre scol, alumno y mayornan pa e tipo di porcentahenan halto asina”. Tur e cuarenta alumnonan a bisti bunita pa topa hunto cu nan mayornan den ballroom di Holiday Inn Hotel. Ey a percura pa un catering pa tur presente, algo di bebe y despues ricibi diploma den man.
Clay Shipley a splica e graduadonan cu nan lo ripara den bida y den e siguiente añanan, cu haya un scol mas halto cada bes lo bira mas dificil. No ta na Aruba so, sino mundialmente tin cuponan limita y no ta tur alumno ta haya chens pa sigui studia y avansa. Asina por mira cu cuponan den MBO, despues HBO y si kier sigui na nivel universitario tambe e ta bira mas dificil.
“Pero ora mi topa boso aki algun aña y mi puntra boso con a bay, mi no kier tende cu mi no a sigui pasobra mi no a haya chens. Mi kier tende, meneer mi a purba pero no a logra. Pasobra importante den tur esaki ta pa purba, pusha bo mes na nivelnan mas halto y sigui desaroya. E director di scol ta contento di tende di otro scolnan avansa cu e alumnonan di Ceque College ta haci bon. Asina el a haya feedback di EPI y di Colegio Arubano, cu nan ta satisfecho di e base di educacion cu alumnonan di Ceque College ta yega cu ne.
E aña aki e miho graduado ta Dominik Bitterling, kende cu 7 materia a logra no menos di 55 punto. Otro tres alumno miho gradua ta Vilensca Andrade da Vargem, Christian Aragon y Tene Mujica. Ceque College a obsekia nan un bunita regalo, como muestra di aprecio pa nan estudio duro y pa a haci nan best na un forma excepcional.
A funda Ceque College na aña 2015 y awendia tin no menos cu 240 alumno, parti den prome te di cuater klas. E scol ta situa na Hato # 3-E y ta conta cu un staff di 22 docente cu ta percura pa diariamente e alumnonan ricibi educacion na un nivel excepcionalmente halto y di un calidad unico cu ta refleha den e resultadonan tur fin di aña. E vision di e scol ta pa enfoca riba e studiante y traha un ekipo cera entre mayornan, alumnonan y scol, pa hunto surpasa tur reto durante e aña escolar y pa na final e studiante por sobresali y avansa.
