Benta di Don Jacinto a cay masha hopi y por tribi di bisa casi un 50% y gerencia di e restaurant a indica cu nan kier pa Aruba scucha di nan banda p’asina nan saca nan propio conclusion.
Don Jacinto Restaurant di casi 10 aña di existencia riba nos isla y hopi t’e clientenan cu tin hopi bon comentario dje restaurant.
Sinembargo, riba diasabra marduga, segun gerente general Jhohana Mulcue Peña, a purba di drenta pa horta den e luga. Polis a presenta n’e sitio y a constata e hortamento.
No por bisa exactamente kico un di e agentenan a mira den cushina, pero a haci por lo menos tres grabacion y a hacie viral, bisando cu nan no por traha den e luga.
Peña a comenta cu no kier midi forsa cu ningun hende. Nan ta haci nan parti y mustra e berdad. A graba un video unda cu por a mira precisamente riba e dia di e suceso, con e cushina tabata.
E situacion ta hopi dificil p’e restaurant. Nan ta proveedor di 30 famia cu ta depende directamente di e restaurant y nan ta masha hopi afecta p’e situacion.
Peña a comenta di ta spera cu a traves di medio social y prensa por yega n’e pueblo di Aruba y asina mira e berdad. P’asina nan por lanta bek, ya cu aworaki nan ta den un situacion bastante fastioso y tristo.
Peña a comenta cu e voicenote a cuminsa core merdia y den careda di 3:00 pm Departamento di Salud Publico (DVG) a bin y a bay den cushina, unda cu nan a haci un inspeccion di henter e luga. A haya un informe cu e cushina ta bon. Tin algun cos adicional cu mester a cambia, pero no ta algo cu mester cera e luga, el a bisa por ultimo
