Diabierna atardi, despues di 3:30 pm, a sosode un accidente den caya grandi di San Nicolas. Un Hyundai i10 color shinishi a bolter y un persona a termina herida.
E accidente a sosode dilanti di oficina di dokter Boderie. Cu maximo urgencia polis a presenta na e sitio pa asina cera e caminda y atende cu e accidente aki. A pidi asistencia di ambulance. Momento cu e ambulance a presenta na e sitio, di biaha e paramediconan a atende cu e persona herida, kende a kibra su dede. Despues cu a stabilisa e persona di biaha a transport’e pa hospital p’e ricibi tratamento medico mas avansa.
E auto a sufri basta daño material, unda cu hasta un pida di taira a keda tira riba caminda. No ta conoci kico por a pasa cu e chauffeur a perde control di e auto y bolter.
