Osyth Henriquez, desaroyador di Isla di Oro, recientemente a haya su mes den un caso lanta pa Fundacion Parke Nacional Aruba (FPNA) contra dje y pais Aruba pa stop di haci cualkier trabao di limpiesa riba su tereno.
E desaroyado, kende ta conoci como un protector di medio ambiente, a conta henter e desaroyo con el a yega na Isla di Oro. Ta un proyecto cu e tabatin ocho aña trahando riba dje y net na momento cu el a pensa di entrega, e propietario a tuma contacto cu ne.
Tur cos a cuminsa na momento cu e mes a cuminsa haci averiguacionnan di kico por y kico no por y cu el a informa Fundacion Parke Nacional Aruba cu e ta bay haci e luga limpi. Y contrario na loke a bisa inicialmente, corte a puntr’e si e ta dispuesto pa para cu e trabounan di limpiesa te ora cu e tuma un decision. “Y mi a coopera.”
Henriquez a conta si cu Isla di Oro tabata hopi sushi mes, e parti di mangrove tabata pio ainda. El a reuni cu FPNA, Directie Natuur en Milieu (DNM) y tur departamento concerni, anto a bisa nan cu lo kier haci un limpiesa. Prome cos cu nan a bisa via un carta ta cu nan no kier desaroyo – cu no ta bay bin hotel eynan.
Nan a transporta tur cos via di un barge – ya cu e tabata un situacion mas dificil ora cu na tera ta haci limpiesa. “Ora ta riba lama bo mester e material pa pone y transporta e desperdicio. E tabata algo hopi logico cu nos a pensa. No a haci ningun daño ni a mishi cu ningun mata pasobra ariba e tereno di isla di oro no tin mangrove, tin un algun cu no ta cay den nos tereno mes.” Ademas, el a conta cu e mangrovenan no a multiplica tampoco den ultimo 50 aña eynan.
E ta bisa cu nan por declara cu nan tin un track-record pa cuida mangrove. Nan tin un fundacion pa cuida pa cuida e matanan aki y hasta a regala De Palm Island 200 mangrove, pa despues haya un carta di Parke cu no mag planta mangrove.
El a splica cu kier a haci e limpiesa, pasobra tabatin hopi cos peligroso eyriba manera plachi di parasol y hopi mas di hero. Pero tambe el a bisa cu si bay wak, “e departamentonan por constata cu nos no tabata daña naturalesa, nos no tabata haciendo nada malo.”
PARKE KIER ISLA DI ORO
Henriquez ta bisa cu e situacion ta cu Parke kier e isla. Nan por a cumpr’e cualkier momento prome cu ne pasobra esaki tabata habri. A cumpra e isla cu e unico obhetivo pa por rebiba e boto pa por conserva algo di historia. “Eynan mi ta sinti cu Parke no tin e amor pa Aruba suficiente pa wak cu bo tin proteccion di naturalesa pero balornan cultural-historico tambe,” segun Henriquez. Ken cu bo puntra, tin un bunita recuerdo di eynan. E ta un bunita historia, algo iconico. Esey Henriquez ta sinti cu no tin ningun tipo di respet pa esaki.
Pero tambe el a expresa su sentimento riba e forma con ta trata cu inversionistanan local, Rubiano. No ta sinti cu tin respet pa nan vision pa cu nan isla. E stranhero ta wordo miho trata. Y hustamente esun cu ora cos bay malo, ta simplemente paketa maleta y bay pasobra e no tin conexion cu e isla. Y esaki ta loke cu Henriquez ta lamenta masha hopi mes.
