Segun Mike Eman, como lider di partido AVP, como prome minister, for di prome dia di Gobernacion, a cuminsa cu un proceso pa trece mas equidad den e distribucion di entrada na Aruba.
Por ehempel den e añanan cu mester a bin cu cambionan por ehempel di prima di AZV, prima di AOV cu a wordo aumenta directamente contrario na pasado, a compensa esakinan cu un reparatietoeslag cu a cubri mas cu e aumentonan di prima cu tabata tin, pa sigura cu tur hende bao di 2500 ta haya un aporte directo di Gobierno pa mantene nan poder di compra y hasta avansa nan poder di compra. Comercio e ora tambe por mira cu Gobierno ta haciendo algo cu tabata hopi unico, pasobra si un empleado no ta haya suficiente entrada, normalmente e ta bay busk’e cerca e propio doño di trabao y awo door di bin cu reparatietoeslag a alivia e posicion di e doño di trabao tambe, door cu Gobierno mes ta duna e espacio. Si lesa e programa di partido AVP pa e siguiente periodo di Gobernacion, tin pa añadi na e reparatietoeslag un huurtoeslag tambe.
Famianan cu ta cay den cierto bracket di entrada sigur di 2500 bin abao, ta bay haya banda di reparatietoeslag, tambe por lo menos 300 florin pa esnan cu ta na e punto di mas abao di calculacionnan cu ta haciendo. 300 florin pa luna cu ta bay sali for di caha di Gobierno, aportando na famianan cu tin un entrada di salario minimo, pa por yuda cubri gastonan di huur, algo cu na Hulanda cu conoce hopi aña caba cu ta huurtoeslag cu awo ta bay introduci como parti di programa di AVP. Tur esaki naturalmente ta haci tambe cu pa e propio gremio comercial e parti di cuanto presion nan mes ta haya tambe pa ahusta nan salario, Gobierno tambe ta yuda alivia esey cu for di caha di Gobierno ta yuda carga esnan cu ta traha den sector priva tambe, por ehempel cu un huurtoeslag cu ta bay introduci. Pesey toch comercio, sigur algun di e voceronan mester wak cu ta hopi importante pa un pais, si bo kier un calidad di bida, si bo kier un equidad husto den reparticion di entrada, no por wak reparticion di entrada y un bon salario pa nos hendenan den forma asina “kortzichtig”.
Tin cu wak’e a termino largo. Un pais caminda cu tur hende tin un bon entrada, cu no tin pobresa, cu tur hende tin un calidad di bida, ta na bienestar di nos tur. Ki gana cu bo ta doño di empresa, bo tin entrada, bo ta biba den bon cas y net p’ariba dibo bo ta mira miseria, probresa, of consecuencianan di miseria y pobresa, door di criminalidad of otro aspectonan caminda cu ta afecta toch e calidad di bida general di e pais.
Ta importante no unicamente lidernan di e servicio publico, di e vision nacional, pero tambe esnan cu ta den comercio, mira cu no ta semper bo no ta wak’e asina direct, manera cu e ta wordo haci, pero wak’e den contexto di un sostenibilidad mas duradero, di un pais mas sano, di un pais mas husto. E ora ey bo ta wak como doño di trabao tambe, cu bo mester crea espacio pa bo empleado por crece, no unicamente den salario, sino tambe den conocemento, den curso. Tur esaki tambe ta den e programa di partido, cu kier pa doño di trabao tambe crea espacio di tempo durante ora di trabao, pa hendenan por keda profesionalisa nan mes, pa hendenan por prepara nan mes tambe, pa ta un bon mayor, pa e muchanan na scol, haya e informacionnan mas ultimo riba kico ta pasando na nan scol. Tur esakinan ta forma parti di e programa y ta keda convenci cu reparticion husto di entrada ta algo esencial pa un pais duradero, pa un pais husto. Pesey no ta cambia di opinion cu e aumento di salario minimo aki tabata mas cu husto.
