Algun dia pasa Prome Minister Mike Eman a bisa cu e pensionado lo bay disfruta di un aumento. El a aclarea un tiki mas, si tin un Gobernacion di Mike Eman III, un Gabinete nobo, kico ta e aumento akinan.
A mira cu hopi di e pensionadonan ta biba toch cu recursonan limita. E aumento di pensioen semper mester bay cu locual e fondo por carga y dentro di esey a busca espacio tambe pa e aña aki subi’e cu 2%. Banda di esey, mescos cu pa esnan cu salario minimo, tin hopi pensionado, sigur ora cu uno para su so y no ta un pareha, pero ta su so, ta biba cu alrededor di 1050, 1100 florin. Bo tin cu paga un cas di 400, 500 of 600 florin, ya mita di e pensioen a bay. E huurtoeslag cu lo bay bin cun’e, pa tur esnan cu tin un entrada bao di 2500 florin, ta bay yuda nos pensionadonan enormemente. Cada pensionado ta bay haya 300 florin acerca, si e no tin ningun otro entrada pa por yuda paga pa huur di nan cas. Esaki ta bay haci un diferencia hopi grandi den e entrada y e fortalesa di esnan cu ta biba cu entradanan margina y hopi biaha esnan cu ta pensionado, ta pasa e momento mas dificil, pasobra hopi biaha bo ta na edad tambe cu bo no por haci un side job, bo no por haci nada pa haya un entrada adicional.
Bo ta depende full riba e entrada y toch limita den loke bo por haci pa aumenta bo entrada. Eynan ta caminda cu Gobierno tin cu drenta aden pa yuda e casonan aki.
Un otro parti cu a haya atencion ultimo tempo tabata e parti di 85 florin cu a keda den deliberacion cu OPPA, cu un combersacion cu a duna empleadonan publico y cu den e loskoppeling di e fondo no a keda full aclarea, si e ultimo ahuste eynan cu empleadonan publico a haya, cu esakinan lo conta tambe pa e pensionadonan. Gobierno y esnan sinta na mesa a pensa cu a compronde cu pa e pensionadonan esaki tabata un loskoppeling tambe. Den futuro nan ta haya indexering, segun cu e fondo di pensioen ta permiti.
Di otro banda ta scucha di esnan di OPPA cu esaki no tabata mucho cla. Pa e motibo eynan Gobierno a bisa cu nan lo sinta na mesa cu OPPA y a palabra tambe cu apesar cu e no ta den presupuesto, cu lo bay crea espacio pa e 85 florin eynan tambe bira parti di un afrekening bieu cu tabata tin ainda cu e pensionadonan, pa asina por garantisa tambe cu tin un fairness con a crea toch e separacion na cierto momento cu a bin cu bo tin APFA para riba su mes, cu e fondo di pensioen, cu su propio indexering y bo tin empleado publico cu su propio indexering.
