Fundacion Arubano di Esnan Visualmente Incapacita (FAVI) a caba di celebra 50 aña riba 21 di februari, y diasabra mainta hunto cu Aruba Doet y Iron Order Aruba a bin hunto pa organisa un Golden Bike Ride p’e clientenan, algun di nan cu pa prome biaha di nan bida a subi un brommer of motorcycle. Na mes momento a combina e celebracion pa Himno y Bandera.
Hopi di e clientenan tin un bucketlist, y mayoria a bisa cu un dia nan lo kier core riba un brommer of motorcycle. E momento ey a acerca e gruponan di Harley pa cual Iron Order a acepta e reto mesora.
Nan a sali for di FAVI na Primavera, bay direccion rotonde di Cumana, pa aeropuerto bay ariba, direccion Mangel Halto. E paradanan tabata entre otro na Kulture Cafe, n’e Anker cora, saca potret relax y sigui bay Rodgers Beach. “Mirando cu nan tin limitacion di bista, nan no ta activo mas den comunidad, toch nan kier forma parti di comunidad.
Ta hopi importante pa saca nan for di isolacion mirando cu algun di nan ta biba nan so,” segun Catherine Midi, coordinador di actividad na FAVI. Cos asina ta sumamente importante pa nan y bo ta wak con e ta haci un diferencia den nan bida.
Celebracion di Himno y Bandera ta hopi importante pa nos tur y pa nos tur gosa di dje sanamente t’e conseho di FAVI p’asina tur hende bin bek bon cerca nan sernan keri.
Ta gradici Aruba Doet p’e proyecto aki, na tur cu a para banda di caminda y wak e grupo diasabra mainta y aplaudi e clientenan cu tabata sumamente contento di por a experencia esaki.
Algun bo por a mira e tabata realmente algo dibertido pa nan di por a subi riba un motorcycle, e sonrisanan tabata masha grandi mes riba nan cara.
Prome cu nan a bay, nan a haya un briefing for di FAVI, e motociclistanan tambe a haya un introduccion y tambe pa introduci nan mes n’e clientenan. Nan a kies esunnan cu ta bay subi e motorcycle, y otronan cu lo a sigui nan tras den un bus prepara cu cuminda y bebida pa nan tur, y nan a sali bay riba nan ruta cu hopi alegria. Sigur un tremendo actividad p’e clientenan di FAVI cu a sa di gosa y aprecia esaki masha.
