Awe nochi lat alrededor di 11:35PM a bati alarma pa un candela grandi na Fermin’s Bar situa na Boegoeroei riba e caminda principal di Noord. Bomberonan a yega den un tempo record y a combati e candela vapvap.
Tabata dia 2 di mei 2019 e mesun restaurant a pega na candela. E tempo ey e candela a cuminsa alrededor di 1:00am. No ta conoci kico e investigacion e tempo ey a saca afo como causa di e candela. Aña pasa e restaurant a keda basta dia cera, pa por a atende cu e daño cometi y pa seguro por a cubri e daño laga atras dor di e candela y awa cu a uza pa combati e candela.
Pa loke ta e candela di awe nochi, cumpliendo cu protocol pa ora tin un candela, a cera tur caminda cu ta conecta pa yega cerca di e restaurant. Elmar tambe a presenta pa check e coriente. Dor di e candela a laga kita coriente pa evita mas fayo y chens pa otro candela.
E origen di e candela awe nochi no ta conoci ainda. Investigacion lo saca afo kico exactamente a sosode. Tabatin Happy Hour mas trempan cu banda musical tocando y e luga yenyen. El a cera pa 11:00pm y un rato despues ya e cushina tabata completamente na candela.
