Tabata awe marduga pa mas o menos 1:40am cu a spacha Bomberonan pa un cas na candela. Ta trata aki di e cas situa na Venezuelastraat # 27, na e crusada di Venezuelastraat y Emmastraat na Playa. Bomberonan a combati e candela den forma rapido.
Bisiñanan a conta nos na e sitio cu e doñonan original di e cas a fayece algun tempo caba. Ta buscando awo pa bende e propiedad. Pero adictonan ambulante a haci doño di e cas, drumiendo eyden y uzando droga den e cas. Henter e vecindario tin masha problema y estorbo cu caranan straño cu ta frecuenta na e cas.
Kico exactamente a conduci na e candela no ta conoci, pero ta sospecha cu posiblemente lo por ta uzo di e droga “base” ta locual por a causa cu a pega algo na candela cu a crece y kima un parti di e sala. Por a tuma nota cu e bentana di sala ta cera cu plywood, cu a kima por completo.
Cuerpo di Bombero y Recherchenan di Polis lo mester investiga e causa exacto y purba yega na e culpabelnan. Spera cu e herederonan di e cas por logra bende e cas pronto of logra cera tur porta y bentana pa evita cu adictonan por drenta y sali eyden, cu e tipo di consecuencianan manera a sosode awe marduga.
