Awe nochi un patruya di Polis pasando dilanti Linear Park a nota con un auto a sortia for di L.G. Smith Boulevard pa drenta e parkeerplaats na Linear Park. Tabata mustra comosifuera cu nan a dal den otro, pa cual e patruya a activa mesora y a baha pa atende e desgracia. E Polis a nota cu for di e auto Nissan March tabata sali un holo fuerte di marihuana pa cual el a detene tur hende. Den e otro auto, e chauffeur di baina por a papia di burachi!
A pidi pa mas patruya yega na e sitio pa por a controla e situacion eybou. A detene dos mucha homber den e Nissan March mientras cu a detene chauffeur di e Mitsubishi, un homber di edad mas halto, cu tabata patapata burachi. Remarcabel ta cu den e Nissan March tabatin un mucha tambe, cu Polis mester a hiba cas, pasobra no por detene.
Investigacion na e sitio a mustra cu probablemente e autonan no a ni dal den otro, sino a pasa hopi cerca. Pero, dor di e maniobra cu e chauffeur a haci a pone cu a bay controla ambos auto y a sali afo cu den esun tabatin holo di droga y den e otro holo fuerte di alcohol.
