E area rond di tanto Colegio Arubano, como Mon Plaisir ta rondona di tanto companianan priva di siguridad como Cuerpo Policial. Esaki ta den cuadro di un mensahe cu a circula ayera di un posibel tip cu a drenta y a bira viral entre e studiantenan.
A cuminsa pase rond. E mensahe cu a circula ta alerta e muchanan pa no bay scol su siguiente dia, mirando cu for di un persona hopi confia a bin haya sa cu lo bay tin un shooting na scol.
Y e ta keda ripiti pa no asisti y bisa e otro muchanan tampoco pa asisti y pa keda difundi e mensahe.
Un situacion similar a sosode algun dia pasa, caminda cu un hoben a manda un mensahe cu lo bay tin un tiroteo na Colegio, te cu a detene.
E scol sigur a tuma e mensahe aki hopi na serio, aunke cu na final a bin resulta cu tabata algo falso. Sin embargo, esey no ta kita cu el a causa basta conmocion no solamente cerca e cuerpo di docente, pero tambe cerca e alumnonan y nan mayornan.
Awe mainta e siguridad sigur ta den un estado basta halto di alerta y ta haci e chekeonan necesario prome cu drenta scol. Tambe e presencia di Cuerpo Policial ta visibel den cercania di e dos scolnan aki y tambe di Compleho Deportivo Guillermo Trinidad.
E siguridad sigur ta eleva entre e dos scolnan menciona.
Pa e motibo aki mes, Colegio Arubano a dicidi di manda un mensahe via Whatsapp pa avisa tur alumno y nan mayornan, cu lo bay tin control y cu a pone polis na altura pa siguridad di un y tur.
