Den un rueda di prensa cu a tuma luga awe mainta na UNOCA, a trece informacion mas recien relaciona cu e concierto di Jonathan Bryan Thiel, alias Jeon, cu lo bay tuma luga diabierna awo dia 25 di maart. Ta desde prome cu pandemia caba tabata anticipa e concierto aki, pero mas cu claro e medidanan relaciona cu COVID-19 a pone cu no por a realisa esaki mas prome. No obstante, e artista ta cla pa deleita pueblo completo cu e canticanan romantico di inicio di su carera como Biggy Boy.
Asina Mark Benson-Denz a conta cu despues di varios luna di preparacion como tambe anticipacion, aworaki si por bisa cu tur cos ta cla y entusiasmo ta halto. Ta varios persona a sa di warda nan ticket y peticion tabata asina grandi cu mester a pone un di dos fecha, esta diasabra awo dia 26 di maart tambe. Pues, diabierna ta sold out caba, pero pa diasabra si tin algun ticket disponibel ainda.
A pidi un y tur pa acudi na Rennaissance Convention Center na ora, pues ya for di trempan lo habri e portanan y pa mas o menos 9:30 pm e show mes lo cuminsa. E show principal lo conta cu un total di 40 exito di Biggy Boy. Despues di e show lo bay tin un after party cu lo sigui te cu oranan laat.
Den palabra di Jeon, nan tabatin hopi tempo preparando caba, pues ya e show mes tabata practicamente cla for di 2020, pero cu e dos añanan cu a pasa, a logra expande esaki cu diferente idea. “Nos ta preparando ful swing pa duna e fanaticonan hopi nostalgia pa nan bib’e momentonan atrobe di Biggy Boy.” Asina el a termina bisando cu tin algun artista cu lo presenta como invitado. Ta trata aki di entre otro artista for di Hulanda, Boneiro y Corsou y cu esaki Jeon a invita un y tur pa busca nan carchi pasobra e anochi ta bay ta yena cu sorpresa.
