Komo Parlamentario pa Partido MAN mi ta tene semper kuenta ku e 5 prinsipionan di MAN ( Dignidat Humano, Hustisia Sosial, Libertat, Solidaridat, i Demokrasia) den mi aserkamentu ku pueblo i pa ku e temanan ku mi ta pone atenshon n’e. Pa ehersé mi trabou na un manera satisfaktorio i efektivo, mi mester ta den kontakto ku komunidat, p’asina mi ta na altura di kiko ta biba den pueblo. P’esei, mi a komprometé tambe pa mi mantené kontakto estrecho ku komunidat pa medio di enkuentronan den bario, mi página di Facebook i sitanan personal. Banda di esaki mi ta mantené lasonan ku miembresia i aktivistanan di MAN pa tuma nota di puntonan ku ta keda tresé dilanti i diskutí na bienestar di komunidat.
Durante mi promé aña komo Parlamentario hopi tabata e reunionnan i aktividatnan di trabou na ofisina di Parlamento i pafó di ofisina. Tambe mi a keda dediká tempu den na página di Facebook, “Kòrsou TIN Trabou”, mirando e impakto positivo ku e tin pa komunidat i e buskadó di trabou. Ya pa mas ku tres aña kaba mi ta kompartí tur vakatura i informashon relevante riba e página aki, ku entre tantu tin mas ku 32.000 siguidó.
Komo frakshon nos a komprometé pa pone nos mes na altura di e retonan den e diferente gremionan na Kòrsou i tambe di temanan manera pobresa, adikshon, prevenshon, bibienda, èts.
Den e kuadro aki huntu ku mi koleganan di frakshon nos a reuní ku entre otro e siguiente gruponan/instanshanan:
1. SITEK: Retonan den enseñansa
2. SSC: e.o. Studia den region i finansiamentu di estudio
3. Feffik (maneho i operashon)
4. CFT: Situashon Finansiero di Pais Kòrsou
5. Habitante RIF: sangura
6. Federashon Otrobanda : Rekorido pa wak situashon di e bario di Otrobanda ku ya ta den e Programa di Urgensha komo un di e barionan piloto.
7. Fundashon pa Konsumidó (Tema: Produktonan Kaduká)
8. KvK: Situashon ekonomiko/ Laboral
9. Fundashon Pro Alfa (yuda empoderá hende muhé ku ta kobra ònderstant
10. Unesco
11. Fundashon Sentro Solari (yuda i guia hendenan ku
limitashon)
Tambe mi a hasi bishitánan di trabou na entre otro e siguiente fundashonnan:
1. Famia Plania
2. Fundashon kas Popular FKP
3. Fundashon pa Maneho di Adikshon FMA
4. Fundashon Prevenshon
5. Fundashon Pro Bista
6. Fundashon Material pa Skol
7. Stichting Thuiszorg Bandabou
8. ACU Credit Union ( den kuadro di Dia di Koperativa i 55 aña ACU)
Banda di esakinan mi a bishitá varios aktividat ofisial i sosial, entre otro:
1. Groundbreaking Nieuw Nederland
2. Selebrashon Dia di Bandera di pais K òrsou ( entre otro Lagun, Barber i Bònt)
3. Selebrashon Dia di Outonomia
4. Selebrashon 206 aña Independensha di Venezuela
5. Selebrashon 95 aña Biblioteka Nashonal
6. Helo Skalo i Skalo Foodies Fest den Scharloo
7. Merkado Sosial BETH riba Brionplein
8. Selebrashon 100 aña di Vírgen di Fátima na misa di Suffisant
9. CARIFTA Games na SDK
10. Marshe di Mucha na Plaza Nobo
Diálogo Nashonal
Mi a asistí na Diálogo Nashonal riba Abusu Relashonal i di Mucha i mi a partisipá na Diálogo Nashonal riba Enseñansa.
IPKO
Durante e siman di 9 pa 12 di yanüari 2017 a tuma lugá e promé IPKO pa aña 2017 aki na Kòrsou. Aunke ku aktualmente mi no ta forma parti di e Komishon “Rijksaangelegenheden, Interparlamentaire Relaties en Buitenlandse Betrekkingen, mi a asistí na IPKO komo “toehoorder”. Mi ta haña importante pa mi ta na altura di kiko ta keda diskutí riba nivel di reino i tambe p’ami por a sera konosí ku mi koleganan parlamentario den reino.
Parlatino
Miembronan di Parlamento di Kòrsou i di otro paisnan di Karibe i Latino Amérika ta partisipá na Parlatino.
E biahe di trabou pa Parlatino ta konsistí di un mínimo di 3 dia di interkambio i palabrashonnan ku ta keda hasí den e Komishonnan Fiho di Parlatino.
E komishonnan fiho di Parlatino ta komparabel ku Komishonnan Fiho di Parlamento di Kòrsou. Den e komishon di Parlatino bo ta prepará proposishonnan pa bai Asamblea General pa medio di e Junta Directiva.
Parlatino ta keda oganisá na Panamá pero por sosodé insidentalmente ku un òf mas komishon ta reuní na otro paisnan den Karibe òf Latino Amérika.
Temanan ku a keda tratá den mi komishon ta entre otro, “Trabajo para Discapacitados” i “Empleo Juvenil”. Pa loke ta trata “Trabajo para Discapacitados” nos ta trahando riba un Ley Marco ku ta duna oportunidat laboral na hendenan ku limitashon.
Mi por bisa ku sigur e biahe pa Parlatino tin un balor agregá pa e Parlamentario i pa su pais en general. Aparte di e diferente aktividatnan i trabounan den komishon, e 3 dianan aki tabata hopi importante tambe pa hasi “networking”. Bo ta sera konosí mihó ku koleganan di otro paisnan i interkambiá tokante e trabounan di parlamento. Esaki ta fasilitá despues e kontakto den eksterior tambe.
Inzamelactie
Despues ku Orkan Irma a pasa Islanan Ariba, riba mi inisitiva, nos a organisá un “inzamelactie” pa damnifikadonan na Sint Maarten. Nos a keda hopi satisfecho ku e kantidat di hende ku a koperá i trese awa i produktonan alimentisio na nos sede. Despues, tur artíkulo a keda entregá na Krus Korá.
Banda di ta trahando riba e inisiativa di lei
“Flexibel werken”, mi ta kere ku nos mester hasi mihó uso di nos leinan eksistente i aselerá e proseso di inisiativanan di lei.
Basá riba mi areanan di enfoke, mi ta para ketu na por ehèmpel:
1. Lei di Maternidat: Mi ta boga pa kumplimentu ku lei di Dunamentu di Lechi na Pechu bou di ora di trabou (ankrá den Kodigo Sivil buki 7A).
2. Lei di Paternidat: Mi ta boga pa finalisá e trayekto pa e lei “Aanwijzing Vermoedelijke Verwekker”, ku SEDA a propone, drenta na vigor mas lihé ku ta posibel.
3. Lei di BION: Mi ta boga pa revisá i adaptá Lei di BION.
Tambe mi ta boga pa mas Oportunidat laboral pa Hendenan ku Limitashon.
Komunikado di Prensa:
Na promé lugá mi ke gradisí tur medio di komunikashon ku a duna atenshon na tópikonan ku mi a manda atrabes di e varios komunikadonan di prensa.
Durante e periodo tras di lomba aki, mi a saka varios komunikado riba temanan manera:
Pedowatch, pa evitá mucha bira v íktima di abusu seksual,
“The Boy Problem”, pa evitá ku mucha hòmbernan ta keda atras den enseñansa,
Lei di Maternidat, ku ta duna derechi na mamanan ku ta traha pa kòlf òf duna su yu lechi na pechu bou di ora di trabou,
Lei di Paternidat, ku ta un lei ta ku obligá tatanan rekonosé i kria nan yunan,
Lei di BION, ku ta duna oportunidat na hóbennan pa haña trabou,
Toetsercommissie pa evitá mal uso di ònderstant.
Tambe mi a manda un karta kaminda mi ta rekomendá Gobièrnu organisá un “Banenmarkt” pa fasilitá e buskadó di trabou.
Pregunta i karta na Gobièrnu
Mi a hasi pregunta pa medio di varios karta na e diferente ministernan.
Entre otro, tokante preokupashon di habitantenan di Bandariba pa ku “Kongestion di Tráfiko riba Caracasbaaiweg”, Seguridat Laboral relashoná ku eksploshon na pòmp di gasolin sta Helena i Turistanan ku ta keda atraká na Bandabou.
Tambe mi a toka puntonan i temanan importante durante reunionnan públiko na Gobièrnu en kuantu funshonamentu di Departamentu di Keho pa Trahadónan i si Gobièrnu a kuminsá prepará pa e asina yamá “Trabounan di Futuro” pa evitá ku sifra di desempleo ta subi. Mester bini riba termino kortiku un “Manpowerplan” pa Kòrsou. Tambe mi a toka estado di mobilario na skolnan, konsientiashon riba produktonan kaduká i ladronisia di outo ku ta afektá komunidat pero en espesial esnan ku nan outo ta nan entrada tambe.
Komo frakshon nos a inisiá:
1. Frakshon di MAN den Bario. Estilo Tertulia Frakshon di MAN ta interkambiá ku habitantenan den 1 of 2 bario riba e promé djasabra òf djadumingu di luna.
2. Porta Habrí serka Frakshon di MAN: Oportunidat pa nos studiantenan hasi un dia di “SnuffelStage”.
3. FACEBOOKPAGE di Frakshon. Tur komunikado i aktividat nos ta kompartí riba e pagina di Facebook.
4. YouTube Channel: Aki nos ta kompartí tur video i entrevista
Tur djaluna nos ta reuní den frakshon. Durante e reunion aki nos ta evaluá e siman anterior, hasi palabrashonnan nobo, prepará pa reunionnan di Komishon Sentral/Públiko i fiha posishon riba sierto tópikonan. Komo Lider di frakshon di MAN mi tin ku duna guia na nos frakshon pero tambe deliberá i sinkronisá regularmente ku e otro Lidernan di Frakshon, entre otro, riba tópikonan di reunionnan pendiente. Nos frakshon ta reuní tur siman ku nos ministernan pa keda na altura di desaroyonan den nos Ministerionan i di Gobernashon en general.
Kada pasa un siman tin reunionnan di Komishon Sentral òf Publiko. Esakinan ta rekerí hopi preparashon i ta tuma hopi tempu si bo ke ta bon prepará. Asina bo mester lesa dokumentonan relevante i pone bo mes na altura di tur kos ku tin di haber ku e tópiko. Asina nos a trata algun leinan importante manera Presupuesto 2017 i Pesupuesto 2018, Lei pa duna eksonorashon di impuesto pa artíkulonan di Skol, Deporte i Kuido, Lei pa duna Insentivonan fiskal pa atraé invershon den nos Sentro di siudat, pero tambe temanan manera, “Herziening Bestemming Oostpunt/EOP, Karni i Produkto Kaduká, Ladronisia di Outo, i Armanan i Droga ku ta drenta nos pais dor di ilegalnan.
Regularmente tin tambe un òf mas reunion di Komishon Fiho di Parlamento. Den e reunionnan di Komishon Fiho, konsistiendo di miembronan di koalishon i oposishon, nos ta deliberá tokante aspektonan di e ministerio konserni. Ami, por ehèmpel, ta miembro di e Komishon Doméstiko ku ta wak i tuma desishon riba asuntunan doméstiko di Parlamento. Tambe mi ta presidente di e Komishon di Labor i Asuntunan Sosial (SOAW). Aki den nos ta trata temanan manera entre otro “Minimumloon” i Abusu Relashonal.
Den e reunionnan di Komishon Fiho miembronan por bini ku proposishonnan dilanti ku, eventualmente, despues por keda tratá den un reunion di Komishon Sentral. Tambe e Komishon Fiho por invitá un organisashon òf sektor privá pa duna un presentashon si e komishon ta deseá informashon di ekspertonan eksterno. Tur organisashon por pidi un reunion ku un komishon fiho ora tin un tema relevante pa interes general. Asina Komishon Fiho di SOAW a reuní entre otro ku Aliansa tokante “Abusu Seksual” kontra mucha.
Esaki ta en breve tur e aktividatnan i trabounan di e aña ku a traskurí. Mi ta kla pa enfrentá un otro aña ku mesun dedikashon i entusiasmo.
