Sindicato STA a reuni cu Aruba Airport Authority (AAA) y nan ta keda para practicamente riba un “no.” Esey ta pone cu e kort geding ta sigui su caminda. Tambe locual a papia riba dje di e verlenging di e contracto colectivo, pero e problema ta cu nan kier bruha dos cos den otro.
Diego de Cuba, presidente di STA, a indica cu esaki ta algo inaceptabel. E cinco departamentonan cu STA ta representa, ta hopi rabia cu AAA. E sistema y manera con nan ta atende cu e empleadonan, nan ta sali for di punto di bista cu e contracto colectivo tin cu aplic’e den su totalidad y “no por aplica esaki ora ta cumbini bo so.”
Na momento cu e ta den deber di trahado, ta aplic’e na tur forsa cu tin. Pero na momento di aplic’e na derecho di trahado, no ta hacie manera mester ta. Esaki ta un problema cu STA ta kere cu mester termina. “Tripel A mester bin na su tino y si ta aplica CAO, aplic’e den su totalidad y no aplic’e mita so,” el a expresa.
E sindicato no ta descarta cu esaki por bin un accion riba aeropuerto. Pero esaki ta depende kico e miembronan ta bay bisa despues cu nan e sindicato informa nan riba e resultado di e reunion. Nan ta rabia cu tripel A pa con nan ta atende cu e asunto aki. Tripel A N.V. ta un di e prome companianan cu a reorganisa, pasobra ta papia di cuarentiocho hende pero aparentemente tin diesun cu ta bay cas. Awo ta mustra ken bo ta y ta keda bati trahadonan, p’esey STA no ta acepta esaki.
P’esey ta laga e cos aki bay caba den Corte y pa hues duna un sentencia riba e cos aki. Despues di esaki e sindicato lo atende cu minister riba e asunto aki.
