Diabierna anochi a tuma luga e Mascarade Parade Savaneta. Hopi hende a yega Savaneta pa asina mira e parada di mascarada. E parada a sali for di ex-warda di polis di Savaneta, pasa dilanti ex-Brisas del Mar, Zeerover pa termina na Centro di Bario di Savaneta.
Remy, miembro di Fundacion Savaneta, a indica cu nan tin mas o menos dies grupo. Despues cu e parada termina, e ambiente ta continua cu un fiesta te 3:00 am. Pa acompaña e participantenan, tabatin cuater brassband y dos pickup cu sound. El a indica cu tur cos tabata cana tremendo y hopi persona a presenta pa mira e parada, di cual e tabata agradecido.
Despues di hopi aña un biaha mas a organisa parada den Savaneta. El a expresa cu nan ta mirando si por lanta un grupo di carnaval pa otro aña, pero tur cos ta bay pocopoco, pa asina nan por participa den carnaval. E idea ta pa haci actividad y e ta spera cu pa otro aña nan bira mas grandi y yuda engrandece carnaval.
Tanto adulto como mucha a disfruta di e parada di Savaneta. Hopi reina cu a yega di representa Savaneta tambe tabata presente.
