E proximo eleccion lo ta bay ta un cambio grandi, no solamente pa Aruba, pero pa e partidonan politiconan mes. E generacion di baby boomers despues di hopi tempo lo no ta esun cu ta bay domina resultado di e votacion pa eleccion parlamentario 2025. Ta importante pa mantene e grupo aki como votado, pero tin dos generacion nobo cu ta Generation X y Millenials cu lo forma e grupo di mayoria di e votadonan.
Esaki ta aspectonan cu partidonan tradicional, manera AVP y MEP, mester tene cuenta cu nan pa no disparce denter di algun aña. A pesar cu nan ta forma parti di e historia di Aruba.
Den cuadro di esaki por a tuma nota di presencia di hopi politico nobo, tanto den e partidonan nobo como den esunnan tradicional.
Recientemente un noticia cu a capta hopi atencion den fin di siman ta e anuncio cu yiu muhe di un votegetter grandi di Aruba, Benny Sevinger, kende, mirando e estudio cu el a sigui, lo ta preparando su mes cu cursonan na Hulanda den Staats- y Bestuursrecht pa por bin sirbi su pais.
Por a lesa esaki riba e Facebook di lider di e partido berde, anunciando “e grato noticia cu Stephany Sevinger” a finalisa un curso importante den Staats- en Bestuursrecht y por a mira centenares di LIKES riba e post aki. Riba e post di felicitacion pa Stephany a bin hopi comentario di apoyo tambe.
Pa esnan cu no sa, Stephany a lanta den un hogar dedica na politica y durante e ultimo eleccion a dirigi e campaña di su tata Benny Sevinger bao circunstancianan dificil y a logra hopi voto pa e por a keda eligi cu votonan preferencial. Como hoben, sin ningun experiencia di e mundo ey, el a dal su prome stap y a tuma rienda di e campaña pa dirigi activista- y votadonan di su tata pa keda motiva y activo. Stephany a mustra hopi habilidad di hiba discurso y talento pa por organisa y motiva un organisacion.
Buscando informacion, a bin tende cu el a finalisa su estudio di Relacionnan Internacional na Merca y despues a dicidi di bay un curso adicional na Hulanda. Cu esaki e ta adkiri conocemento riba e tereno di gobernacion y derecho estatal.
Entrada di e hoben den fila di e partido tradicional aki, ta un indicacion di rejuvenecimento di cu candidatonan hoben y profesional, y mas importante, cu tin tambe conocemento y di cuna politico.
Por a compronde tambe cu durante fin di siman tabatin un reunion di miembro y activistanan di e partido berde, y a probecha pa pasa un video, den cual e hoben aki a manda un mensahe, cu a mustra cu e ta evaluando seriamente pa bin sirbi su pais.
Ultimo luna, den forma tras di cortina, e partido a instala un comision cu ta combersando no solamente cu actual candidatonan pero tambe futuro candidatonan. Ta analisando ki cambionan ta haya necesario y cual ta temanan cu mester concentra riba dje na beneficio di e pueblo, segun un fuente cerca na e comision a duna di conoce.
Den e ultimo conferencia di prensa por a tuma nota cu e partido ta trahando seriamente riba campaña despues cu e partido geel MEP mes a cuminsa basta luna caba. AVP a presenta e 10 puntonan cu ta bay concentra riba nan.
Y hustamente un di e recomendacionnan cu e comision a trece dilanti ta cu e partido tabata mucho morto y mester trece mas energia y dinamismo. Y por a mira un cambio den e esaki recientemente.
Un otro candidato cu a resalta e siman aki, aunke el a debuta caba den e ultimo eleccion tabata Clifford Heyilger. El a bay riba un tema cu ta yega hopi na e ciudadano. Cu gobierno ta papia yen di cos bunita pero e realidad ta cu e placa no ta yega pa cumpra cos. Un ciudadano por ehempel a conta cu e tin un lista fiho di loke e ta cumpra tur luna pa cas. Semper e ta paga no mas cu 500 florin. Masha poco ta desvia di e lista aki. Y awo loke cu e ta paga cu e mesun lista di comestible ta casi yega 925 florin. Y esaki ta loke ta e preocupacion di pueblo, di no por come saludabel mas na Aruba.
DATO ELECTORAL
Na eleccion 2013, un total di 57.794 persona a vota pa 6 partido, 88% di voto (50.756) a bay pa AVP of MEP y 12% (7.038) a bay pa un alternativa. Na eleccion 2017, 58.652 persona a vota pa 8 partido, 77,5% di voto (45.437) a bay pa AVP of MEP y 22,5% (13.215) a bay pa un alternativa. Na eleccion 2021, 58.610 persona a vota pa 12 partido, 67% di voto (39.035) a bay pa AVP of MEP y 33% (19.575) a bay pa un alternativa. Den cada un di e ultimo tres eleccionnan e alternativa(nan) pa AVP y MEP a crece mas cu 10% di un forma consistente. Esaki ta motibo cu partidonan tradicional ta trahando pa trece cambio.
Segun datonan di CBS, pa eleccion 2025 nos electorado lo ta dividi asina entre e generacionnan:
· Silent (80+) 4%,
· Baby Boomers (61-79) 26%,
· Generation X (45-60) 30%,
· Millenials (29-44) 26% y
· Zoomers (18-28) 14%.
