Segun informe policial, husticia ta papia di caso di asesinato. Corsou a conoce un morto tragico y horibel na momento cu a descubri un curpa cu tabata drif riba su barica den Bahia di Playa Canoa.
Diadomingo den ora di merdia, den careda di 2:10 pm, momento cu central di polis a haya e prome notificacionnan di comunidad indicando descubrimento di un curpa ta drif den awa cant’i costa.
Algo cu tabata hacie mas alarmante tabata informacion di esunnan cu a yama, ta cu nan por mira cu e curpa tabata mustra di ta mara na man y pia cu cabuya.
E agentenan policial cu a presenta na e sitio, en berdad a constata un curpa ta drif bin aden. Por a mira cu e tabatin un flanel berde bisti, un jeans y un tas di Louis Vuitton. Personal di Bombero, polis y wardacosta a presenta mesora na e sitio pa asina cuminsa cu e accion di recuperacion di e curpa, como cu esaki tabata pega den e baranca na e costa.
Un rato despues, dokter a presenta pa asina constata morto di e victima. Informacion cu por a saca afo na sitio mes ta cu tabata trata di un curpa di un hende homber. Aparentemente e curpa tabatin marca di kemadura na su lomba. Tanto su mannan y pia tabata mara y banda di esaki su garganta tabata mara cu tiewrap.
A indica cu e curpa tabata intacto ainda na momento cu a descubrie, cu ta señal cu lo ta trata di un caso di asesinato. Riba ordo di fiscal y ministerio publico, a confisca e curpa pa investigacion.
