Relaciona cu e 38 aña di Cecelito Lopes den radio difusion, lo tin un festival di mariachi cual lo tuma luga dia 1 di juni 2024 na Club Caiquetio Paradera. E festival lo cuminsa pa 8:30pm. Mariachi Reyes de Aruba bao liderazgo di Ernan Angela cu pa prome biaha lo compaña e cantantenan riba e festival di mariachi.
“Aruba completo ta bon bini pasobra mi sa cu aworaki tur hende ta puntrando pa carchi, nan ta obtenibel cerca tur cantante y alabes nos tin cuater outlet: Gayo Rollo na San Nicolas, Citgo Sta. Cruz, Shaba Pastry na Noord y The Coffee Table na LG Smith Boulevard unda bo ta para n’e bentana cumpra bo carchi na e drive-thru mes. Tin categoria A y categoria B den e festival, y Cecelito ta splica cu tin hopi cantante nobo cu ta pa prome biaha ta subi escenario. Tin algun cu ta desea di canta den categoria B pasobra no ta cla ainda pa pasa categoria A. “Anto sigur nos ta hopi contento di e parti aki tambe,” segun Cecelito Lopes.
“Mi kier a desea tur e participantenan aki hopi exito. Mi sa cu semper ora mi trece e festivalnan aki nan ta contento. Nan ta bini hunto pasobra nos sa cu pueblo di Aruba riba e anochi aki lo bay gosa un mundo cu locual ta e gran festival di musica ranchera.”
Cecelito Lopes a cuminsa su carera di radio na aña 1986 y sigur aworaki e ta celebrando 38 aña haciendo esaki. Despues di ocho aña e ta bek cu e song-festival aki di mariachi, e prome programa cu el a presenta na radio y pa esey tur hende conoce Lopes como promotor di musica ranchera. “Mi ta hopi contento pasobra e reaccion ta hopi positivo.”
