Diamars a tuma luga e premierè di e musical Tula na Corsou. Riangelo Escoldino tabata protagonista di e obra aki, den e papel di Tula. El a describi Tula como un homber religioso, un homber sabi y inteligente cu a haci hopi pa Corsou y p’e tabata sigur un honor di a represent’e den e obra.
Den e obra, Tula tabatin un mama cu tabata preocupa pa e situacion, pasobra cu e tabata sa di e consecuencianan. Y den bida real, e consecuencianan di e lucha tabata fatal, ya cu Tula a paga un prijs caro p’e libertad hunto cu su otro compañeronan di lucha.
Pa por a controla Tula a corta su cabes afo. Y esey ta loke por a experiencie den e obra y e mensahe di libertad cu kier a trece dilanti den e obra aki.
E temponan aya, e catibonan no tabatin e libertad di haci loke nan kier, bay ora cu nan kier. Escoldino a sigui bisa “Awendia nos tin e libertad, pero mentalmente, nos ta liber?” Esey ta e mensahe cu a trece dilanti cerca e publico cu a contesta di biaha cu no, cual sigur tabata algo cu ta pone bo pensa… Algo cu lo mester trece dilanti cerca e hubentud y traha riba esaki.
Metafora
Un metafora cu a bin dilanti cerca e publico tabata e echo cu e islanan no ta liber. Hopi biaha un yiu ta bandona cas y sali bay. Pero den caso di e islanan, esaki no t’e caso..
Kisas nan ta autonomo, pero no completamente liber ya cu te ainda ta bibando den “cas di mama.”
Pa Escoldino, kisas e storia di Tula ta algo di casi 150 aña pasa, pero ta algo cu ta referente n’e situacion actual den 2024, pero den un escena diferente.