Tres planeta lo forma un triangulo

2070

Diadomingo proximo, dia 10 di januari, lo tuma luga un fenomeno astronomico mes inusual cu espectacular: Un tripel conhuncion di Jupiter, Saturno, Mercurio. Tin e posibilidad di wak nan hopi den shelo, hopi di cerca, a simpel bista, segun Forbes.

Jupiter (mas briyante), Mercurio y Saturno (mas sutil) lo forma un triangulo celeste den e shelo nocturno despues cu solo baha. E lo aparece pa 30 minuut despues di atardi riba e horizonte zuid-oost y specialistanan ta conseha pa uza verrekijker pa localisa Saturno.

Aunke e miho anochi pa contempla e triple conhuncion ta diadomingo 10 di januari, astronomonan tambe ta indica lo ta posibel pa wak Mercurio cerca di e dos planetanan aki, poco despues di bahada di solo riba e dos dianan prome y e dia despues.

Di su banda, dia 11 di januari astronomonan aficiona lo por wak e Luna creciente hunto cu Venus. Un 45 minuut prome cu solo sali riba e horizonte zuid-oost, lo ta posibel pa wak un Luna creciente super fini, ilumina pa un 3.6%, na solamente un distancia angular di 1.5° di Venus. Pa por wak e fenomeno aki, lo ta miho pa uza verrekijker.

Dia 21 di december a tuma luga e gran conhuncion di Jupiter y di Saturno. Aunke e alineamento entre ambos planeta ta tuma luga cada 20 aña, e acercamento aki tabata un fenomeno astronomico hopi raro debi na e tempo cu e dos curpanan celeste ta dal un buelta rond di e solo: Jupiter ta haci’e den 11 aña y 314 dia, mientras cu Saturno mester di mas di 29 aña. Un conhuncion asina cerca, manera esun di aña aki, lo no bin bek te cu maart 2080.